Ахсынньы 3 күнүгэр Аан дойду үрдүнэн инбэлииттэр күннэрэ бэлиэтэнэр. Мэҥэ Хаҥалас улууһугар сэтинньи 28 күнүттэн ахсынньы 7 күнүгэр диэри доруобуйаларынан хааччахтаах дьон Аан дойдутааҕы күннэригэр аналлаах дэкээдэ ыытыллар.
Уон күннээх дэкээдэ иитинэн улууска киэҥ хабааннаах тэрээһиннэр ыытыллаллара былааннанар: успуорт көрүҥнэригэр күрэхтэһиилэр, куонкурустар, ток-шоу, үлэ миэстэтин дьаарбаҥката, бэйэ дьыалатын тэриниигэ сүбэ-мунньах, интеллектуальнай оонньуу, уйулҕа трениннэрэ, маастар-кылаастар, дьиэлэринэн сылдьан доруобуйаларын туругун көрүү тэриллэр. Ону сэргэ Майа сэлиэнньэтин дьаһалтатын көҕүлээһининэн баанньыкка босхо сылдьыы, баттах кырыттарыытыгар, массааска чэпчэтиилээх өҥөлөр оҥоһуллаллар. Нэһилиэктэргэ доруобуйаларынан хааччахтаах дьоҥҥо араас чэпчэтиилээх өҥөлөрү оҥоруохтара, дьиэ ис-тас үлэтигэр волонтердар көмөлүһүөхтэрэ, муус ылан биэриэхтэрэ, муҥха балыгынан күндүлүөхтэрэ.
Аллараа Бэстээххэ Т.А.Пинегин аатынан «Парус» успуорт комплексыгар инбэлииттэр улуустааҕы ыспартакыйаадаларынан дэкээдэни үөрүүлээхтик арыйдылар. Тэрээһин кыттыылаахтарын улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, улуустааҕы социальнай көмүскэл управлениетын начаалынньыга Иван Шестаков, инбэлииттэр улуустааҕы уопсастыбаларын бэрэссэдээтэлэ Тамара Пермякова, физическэй култуура уонна успуорт управлениетын начаалынньыга Алексей Попов, о.д.а. эҕэрдэлээтилэр, күүстээх санаалара, олоххо көхтөөх сыһыаннара уҕараабатыгар баҕардылар.
Доруобуйаларынан хааччахтаах дьон ортотугар ыытыллыбыт улуустааҕы ыспартакыйаадаҕа успуорт 5 көрүҥэр 12 хамаанданан 127 киһи кыттыыны ылла. Уопуттаах судьуйалар быһаарыыларынан бастыҥтан бастыҥнар ааттаннылар.
Дуобакка Дмитрий Сыромятников (Бөкө) бастаата, иккис миэстэни Анатолий Стручков (Нуораҕана), үсүһү Дмитрий Филиппов (Табаҕа) ыллылар. Дьахталларга туһааннааҕынан Яна Стручкова (Төхтүр), Лидия Николаева (Төҥүлү), Светалана Матвеева (Бөкө) бириистээх миэстэлэргэ тигистилэр.
Хабылыкка, хаамыскаҕа Василий Романов (Майа) улууска бастыҥын аатын кимиэхэ да биэрбэтэ. Кини кэнниттэн Анатолий Скрябин (Төҥүлү), онтон Виталий Дьяконов (Павловск) бириистээх миэстэҕэ тигистилэр. Дьахталларга Зинаида Иванова (Аллараа Бэстээх) бастаата, иккис миэстэ Надежда Белолюбская (Павловск), үһүс Маргарита Пепе (Лоомтука) буоллулар.
Остуол тиэнниһигэр бастакы миэстэҕэ Андрей Цыпандин (Төҥүлү), иккискэ Мичил Марков (Чүүйэ), үһүскэ Алексей Стручков (Майа) таҕыстылар. Дьахталларга Елизавета Иванова (Майа) бастакы, Светлана Пинигина (Лоомтука) иккис, Татьяна Цыденжапова (Балыктаах) үһүс көрдөрүүлэннилэр.
Бочча көрүҥэр Төҥүлү хамаандата бастаата, Төхтүр иккис, Лоомтука үһүс миэстэлэннилэр.
Олорон эрэ волейболга эмиэ Төҥүлү хамаандата иннин кимиэхэ да биэрбэтэ, иккискэ харалар, үһүскэ төхтүрдэр тигистилэр.
Онон уопсай түмүккэ ыспартакыйаада кыайыылааҕынан Төҥүлү нэһилиэгин хамаандата тахсан, көһөрүллэ сылдьар куубак хаһаайына буолла. Иккис түмүгү Майа сэлиэнньэтин, үсүһү Төхтүр спортсменнара көрдөрдүлэр.
