Ахсынньы 4 күнүгэр өрөспүүбүлүкэҕэ доруобуйаларынан хааччахтаахтар уопсастыбаларын бэрэссэдээтэлэ Ирина Лебедева көҕүлээһининэн доруобуйаларынан хааччахтаах дьиэ кэргэҥҥэ аналлаах «Бииргэ дьоллоохтук» диэн доруобуйаларынан хааччахтаах ыаллар күрэхтэһиилэрэ дьыалабыай кииҥҥэ буолан ааста.
Санаа көтөҕүүлээх тэрээһини дьүүллүүр сүбэ сыаналаата. Дьокуускай куорат дьахталларын сэбиэтиттэн Ульяна Скрябина‒Умсулҕан Хотун, уопсастыба бэрэссэдээтэлэ Ирина Лебедева, «Саха Өрөспүүбүлүкэтин Аҕа Лигата» уопсастыбаннай тэрилтэ эппиэттиир сэкирэтээрэ Майя Аргунова көрдүлэр.
Аҕыс ыал кытынна. Чаҕылхай, күүрүүлээх күрэхтэһии түмүгүнэн дьиэ кэргэттэр анал ааттарынан наҕараадаланнылар. «Кэнчээри уйата дьиэ кэргэн» ‒ Алдан улууһуттан Поспеловтар, «Кэскиллээх дьиэ кэргэн» ‒ Горнайтан Алексеевтар, «Утумнаах дьиэ кэргэн» ‒ Мэҥэ Хаҥаластан Захаровтар, «Дьол түстээх дьиэ кэргэн» ‒ Хаҥалас улууһуттан Соломоновтар, «Сахалыы куттаах дьиэ кэргэн» ‒ Чурапчыттан Андросовтар, «Билии биһигэ дьиэ кэргэн» ‒ Тааттаттан Тистяховтар, «Ытык дьиэ кэргэн» ‒ Нам улууһуттан Егоровтар, «Айар дьиэ кэргэн» ‒ Бүлүүттэн Протопоповтар ааттаннылар. Кыттааччылар бары сыаналаах бирииһинэн, ону тэҥэ «Тото-Хана», «Махтал», «Занзебар» рестораннарга сэртипикээттэринэн наҕараадаланнылар.
Ньургуйаана Скрябина.
