Быйыл күһүн Мэҥэ Хаҥалас улууһун доруобуйа харыстабылын тэрилтэлэригэр 14 эдэр исписэлиис кэлэн үлэтин саҕалаата. Улуус поликлиникатын мунньахтыыр саалатыгар 2024 сылга саҥа үөрэхтэрин бүтэрэн кэлбит эмп үлэһиттэрин эҕэрдэлээтилэр.
Үөрүүлээх быһыыга-майгыга кинилэри улуус кылаабынай бырааһа Иннокентий Павлов эҕэрдэлээн, ситиһиилээх үлэни-хамнаһы баҕарда. Улуустааҕы поликлиника сэбиэдиссэйэ Тамара Федорова, киин балыыһа идэлээх сойууһун алын сүһүөх тэрилтэтин бэрэссэдээтэлэ Зоя Москвина эдэр үлэһиттэр идэлэрин толору баһылаан, үчүгэй исписэлиис буолалларыгар эрэнэллэрин эттилэр.
Пелагея Федорова улуустааҕы киин балыыһа эпидемиолог бырааһынан, Евгений Тимофеев улуус поликлиникатыгар учаастактааҕы терапевт бырааһынан, Георгий Романов стоматолог бырааһынан, Марк Ефимов Аллараа Бэстээх бөһүөлэгин учаастактааҕы быраас амбулаториятын терапевт бырааһынан, Евдокия Баишева «Суһал көмө» сулууспатыгар медицинскэй сиэстэрэнэн, Арина Тарасова Табаҕатааҕы быраас амбулаториятыгар учаастак медицинскэй сиэстэрэтинэн, Мария Дьячковская Хорообуттааҕы быраас амбулаториятын биэлсэринэн, Наталья Барашкова Бэдьимэтээҕи биэлсэр-акушер пуунун биэлсэринэн, сэбиэдиссэйинэн, Сарыада Догойдонова клиника-диагностыыр лаборатория медицинскэй лаборант-тиэхиньигинэн, Алена Артемьева гинекология салаатын акушеркатынан, Дина Никифорова, Алина Кривошапкина улуус поликлиникатыгар медицинскэй сиэстэрэнэн, Оксана Егорова хирургия салаатын медицинскэй сиэстэрэтинэн, Эмма Джалилова Хаптаҕайдааҕы быраас амбулаториятын биэлсэринэн ананан үлэлэрин саҕалаатылар.
Эдэр исписэлиистэргэ уопуттаах настаабынньыктары сыһыараннар, сатабылларын чочуйалларыгар, үлэһит быһыытынан бастакы хардыыларыгар, салгыы үүнэллэригэр-сайдалларыгар сүбэһит, өйөбүл буолуохтара.
