Елена Прокопьева,
педагогическай үлэ бэтэрээнэ:
— Олунньу ый бүтэһик күнүгэр дойду Бэрэсидьиэнэ В.В.Путин анал этиитин иһиттибит.
Кини 2 чаастан ордук кэм устата биһиги дойдубут Арассыыйа 2030 сылга диэри сайдыытын бырагырааматын кытта билиһиннэрдэ. Былаан баһырхай, киэҥ кэскиллээх!
Дойду баһылыга киэн туттан, өрө көтөҕүллэн туран, бу кэлэр 6 сыл устата дойдуга туох уларыйыы, сайдыы, инникигэ хардыы буолуохтааҕын киэҥник сырдатта. Ол курдук экэниэмикэ, оҥорон таһаарыы, билим, култуура, үөрэҕирии, бырамыысыланнас, тыа хаһаайыстыбатын о.д.а. хайысхаларга киэҥник тохтоото.
Мин тус бэйэм ордук болҕомтобун үөрэҕирии, экология, оҥорон таһаарыы кэскиллээх былааннарын кэрэхсии иһиттим. Дойду демографическай балаһыанньата, дьон олоҕун уйгута тупсуута, ыччакка аналлаах национальнай бырайыак дойду сайдыытын сүрүн соруктарынан буолбуттара киһини астыннарар.
Бэрэсидьиэн этэринэн, биһиги Аҕа дойдубут күүһэ-күдэҕэ, бөҕө тирэҕэ – норуоттар доҕордоһуулара, кинилэр биир сыалга үлэлээһиннэрэ. Бу олус сөптөөх этии! Биһиги киэҥ нэлэмэн дойдубутугар сүүһүнэн араас омуктар олороллор. Кинилэр бары биир сомоҕо буоллахтарына, ханнык да модун күүс кыайыа, булгурутуо суоҕа!