Мэҥэ Хаҥалас улууһун киэн туттуута буолбут 68 төгүлүн тэриллэр В.К.Степанов аатын сүгэр култуура уонна успуорт эстэпиэтэтэ 2-с бөлөххө олунньу 15 күнүгэр Баатара нэһилиэгэр оһуокай түһүлгэтинэн төрүттэннэ.
Иккис бөлөх дьүүллүүр сүбэтин бэстибээл саамай уопуттаах жюрита, Мэҥэ Хаҥалас улууһун Г.Г.Колесов аатынан Олоҥхо дьиэтин дириэктэрэ Евдокия Иванова салайан үлэлэтэр.
Мэҥэлии оһуокайы Сыымах түөлбэтин талааннаахтара Саргылаана Неустроева, кэскиллээх этээччи Тускун Эверстов, талааннаах эдэр ыччат Александра Созонова таһаараннар, 25 киһилээх түһүлгэни төрүттээн үүммүт күммүтүн алҕаан арыйдылар. Көрүү түмүгүнэн Тускун Эверстов уонна Саргылана Неустроева дипломант, Александра Созонова лауреат үрдүк аатын ыланнар, Баатара нэһилиэгин оһуохайын түһүлгэтэ 4,06 баалынан сыаналанна.
Баатара нэһилиэгин талба талааннаахтарын уус-уран оҥоһуктарын быыстапкатыгар 46 уран тарбахтаах 311 үлэни туруордулар.
Лауреаттарынан Лука Романов, Кэскил Романов, Зоя Захарова, «Ыаҕыйа» туос оҥоһуктар түмсүүлэрэ, Егор Плотников, Афанасий Бродников, «Арылы» туой оҥоһуктар түмсүүлэрэ ааттаннылар.
Быыстапка түмүгүнэн дипломант аатын Айталина Павлова, Ирина Винокурова, Айталина Михайлова, Любовь Жиркова, Эльза Эверстова, Лидия Варламова, Вера Попова ыллылар. Көхтөөх кыттыытын иһин грамотанан Василий Попов уонна Акулина Николаевна Попова сыдьааннарын хомуур оҥоһуктарын быыстапката биһирэннэ. Баатара нэһилиэгин талба талааннаахтарын уус-уран быыстапката 4,09 баалынан сыаналанна.
Икки нэһилиэк успуорка доҕордуу көрсүүтүгэр Дьабыыл нэһилиэгэ 19,5 очукуолаах, 15,5 очукуолаах олохтоохтор хамаандаларын хотон, кыайыы өрөгөйүн биллэ.
Толору көрөөччүлээх саалаҕа Нуораҕана нэһилиэгин уус-уран самодеятельноһын кэнсиэрин дьон-сэргэ сэргээн көрдө. Лауреаттарынан хуор толоруутугар «Тыыннаахтар умнубат сыллара» ырыа, Денис Оконешников тойуга, Екатерина Стручкова уус-уран ааҕыыта, «Сиккиэр» дьахталлар ансаамбыллара, Екатерина Стручкова уонна Любовь Самойлова «Мэҥэлэр хайа үрдүгэр» бэйэ айбыт ырыалара, ыччат бөлөҕүн «Дьиэрэҥкэй» үҥкүүлэрэ ааттаннылар.
Кэнсиэр дипломаннарынан Любовь Жиркова сольнай ырыата, ыччат «Чаҕылыс» чабырҕах бөлөҕө, «Нуоралдьыма» бэтэрээннэр үҥкүүлэрин кэлэктиибин «Молдавскай үҥкүүтэ», эр дьон толоруутугар бурятскай үҥкүү уонна эр дьон «Өркөн» ансаамбыла ааттаннылар.
Дьабыыллар кэнсиэртэрэ 4,09 баалынан сыаналанна.
Бар дьон талаанын кустук курдук суһумнатан, норуоту биир иллээх санааҕа ситимнээн, үйэлээх үтүө үгэспит – култуура уонна успуорт эстэпиэтэтэ Сыымах үтүө түөлбэтигэр үрдүк күүрээннээхтик ыытылынна.
Галия Сосина,
култуура уонна духуобунай сайдыы управлениетын иһитиннэрэр-мэтэдиичэскэй киинин салайааччыта.
