Ахсынньы 19 күнүгэр оройуон баһылын отчуоттуур бөлөҕө Доллу нэһилиэгэр олохтоохтору кытта көрүстэ.
Олохтоохтортон отчуоту истэ элбэх киһи мустан мунаарар боппуруостарын ыйыттылар, санааларын эттилэр. Ыйытыыларга сүрүннээн үүт тутуллар сыаната инникитин хайдах буолара, сүөһүгэ бэриллэр көмө харчы, оройуон атыылаһар ирбистэрэ туох диэн быһаарыллыбыта, гаас оһоҕу көрөр-истэр, бэрэбиэркэлиир өҥө сыаната тоҕо ыараабыта, такси сыаната, педиатр, стоматолог боппуруостара буолла. Аллараа Бэстээххэ элбэх оҕолоохторго бэриллибит Б кыбаарталга учаастактарга электроуоту хаһан киллэрэллэрин, үтүөрбэт ыарыылаах инбэлиит оҕону тоҕо сыллата хамыыһыйалыылларын сурастылар.
Үлэ бэтэрээнэ Дмитрий Слепцов оскуола саҕаттан оҕолорго тыа хаһаайыстыбатын техникатын ыытар быраабы ылаллара наадатын, каадыр боппуруоһун көрөллөрүн туруоруста.
Ким Попов уу боппуруоһун туһунан санааларын эттэ. Төҥүлү күөлгэ уу киириитэ аһары барбатын курдук хонтуруолланарын, быһыттары чөлүгэр түһэрэргэ, үс нэһилиэк тыын боппуруоһа буоларын тоһоҕолоон бэлиэтээтэ.
Нэһилиэк баһылыга Николай Сивцев үүтү туттарыы өйөнүллэн тыа сирин олохтооҕо дохуоттаах буоларыгар төһүү буоларыгар баҕа санаатын тиэртэ.
Отчуокка киирбит ыйытыыларга бөлөх кыттыылаахтара туох кыалларынан эппиэттэри биэрдилэр, боппуруостар болҕомтоҕо ылыллан олоххо киллэриллэригэр үлэни ыытарга быһаарылынна.
Марфа Птицына
