Улуу Кыайыы 80 сыллаах өрөгөйдөөх үбүлүөйэ чугаһаатар чугаһаан иһэр. Биһиги, тыыннаахтар, Аҕа Дойду көмүскэлигэр охтубут буойуннар иннилэригэр иэспит – кинилэр сырдык ааттарын үйэтитии.
Маныаха өрөспүүбүлүкэ бары улуустарыгар араас хабааннаах үлэ ыытыллар: өйдөбүнньүк кинигэлэр бэчээттэнэллэр; пааматынньыктар, обелистар, стелалар оҥоһуллаллар; түмэллэргэ саҥа экспозициялар аһыллаллар, ирдэбил үлэлэр салҕаналлар.
Сахалартан бастакы Сэбиэскэй Сойуус Дьоруойа Ф.К.Попов аатын үйэтитиигэ урукку сылларга кырата суох үлэ барбыта. Төрөөбүт дойдутугар Баатараҕа мемориальнай мусуойга Дьоруой олоҕун, хорсун быһыытын көрдөрөр элбэх матырыйаал мунньуллубута. Түмэл иннигэр пааматынньыга турар. Оҕо сааһа ааспыт сайылыгар олорбут дьиэлэрэ, бултаабыт алааһыгар сэриигэ барарыгар туруорбут баҕаната, бэбиэскэни туппут сиригэр өйдөбүнньүк бэлиэ о.д.а. бааллар.
Сыымахха, Дьокуускай куоракка Дьоруой Ф.К.Попов аатын оскуолалар, уулуссалар сүгэллэр. Майаҕа , Аллараа Бэстээххэ пааматынньыктар тураллар. Майа биир киин уулуссата эмиэ Дьоруой аатын сүгэр.
Ааспыт сылга онлайн куоластааһыҥҥа кыайаммыт өрөспүүбүлүкэбит киинигэр Дьокуускай куоракка Ф.К.Попов аатынан уулуссаҕа Дьоруойбубутугар аналлаах искибиэри арыйыыга көҥүл ылбыппыт.
Дьэ ол бырайыак олоххо киириитэ хайдаҕый? Искибиэри тутуу быйыл сайын Федор Попов уонна Феликс Дзержинскэй уулуссалара быһа охсуһар сиригэр саҕаламмыта. Бэйэтэ эрдэттэн үүннэриллибит мастардаах сиргэ ыскамыайкалары оҥорбуттар. Ыскамыайкалар бөҕө-таҕа оҥоһуулаахтар, элбэх киһи мустан сынньанарыгар табыгастаахтар. Ортотугар төгүрүччү бэлиэ мастары аспыттар. Арааһа, пааматынньык дуу, бүүс дуу туруохтаах миэстэтэ быһыылаах. Хомойуох иһин, онтон атын туох да оҥоһулла илик.
Кыайыыбыт күнэ бэрт түргэнник тигинээн кэлиэ, искибиэрбит онуоха диэри бэлэм буолуо дуо диэн ыйытыаҕы баҕарыллар. Мин санаабар, бытаарыы буолбут. Маныаха тустаах тэрилтэлэр дуу, салайааччылар дуу күүскэ хамсаныахтарын наада.
Сахалартан бастакы Сэбиэскэй Сойуус Дьоруойа Ф.К.Попов хорсун быһыыта кэнчээри ыччаты патриотизм тыыныгар иитиигэ биир саамай чаҕылхай холобур буоларын умнумуоҕуҥ!
Елена Прокопьева,
уопсастыбаннай кэрэспэдьиэн.