Олунньу 12 күнүгэр Саха Өрөспүүбүлүкэтин бырабыыталыстыбатын 2023 сыллаах үлэтин отчуота бастакы бөлөххө Дойду нэһилиэгиттэн саҕаланна. Бастакы бөлөҕү өрөспүүбүлүкэ экэниэмикэтин миниистирэ Петр Попов салайар.
Бырабыыталыстыбаттан экэниэмикэ, үп-харчы, баай-дуол уонна ОДЬХХ итиэннэ энергетика, информатизация департаменын салайааччы Наталья Петрова, инновация, цифровой сайдыы уонна инфокоммуникационнай технологиялар министиэристибэлэрин сибээһин сүрүн исписэлииһэ Мирослав Борисов, култуура уонна духуобунай сайдыы министиэристибэтин профессиональнай ускуустубатын отделын салайааӵчытын солбуйаааччы Майя Ермолаева, халааны туоратыы, чөлүгэр түһэрии управлениетын уу хаһаайыстыбатыгар дириэксийэтин дириэктэрэ Гаврил Слободчиков, сыана бэлиитикэтин судаарыстыбаннай кэмитиэтин бэрэссэдээтэлэ Николай Бочков бөлөххө бааллар. Ил Түмэн бэрэссэдээтэлин бастакы солбуйааччы Александр Жирков кытынна.
Улуус баһылыга Дмитрий Тихонов, дьокутааттар сэбиэттэрин бэрэссэдээтэлэ Иннокентий Андросов, управлениелар, тэрилтэлэр эппиэттээх үлэһиттэрэ бөлөххө сырыттар.
Олохтоох нэһилиэк баһылыга Олег Кычкин отчуот мунньаҕын арыйда.
Олохтоохтортон ОДьХХ хачыгаара Егор Ноговицын биэнсийэҕэ олорооччулар хас саастарыгар диэри үлэлиэхтээхтэрин, киин ититэр систиэмэҕэ социальнай эбийиэктэри сэргэ нэһилиэккэ ытык саастаах кырдьаҕастар олороллорунан олорор дьиэ барыта холбонуутун, Балыктаахтан кэлэр суолу оҥоруу, оҕо саад дириэктэрэ Зоя Ефимова экэниэмикэҕэ улуустарга рейтинг, үөрэх министиэристибэтигэр мониторинг, улууспут хаһыс миэстэҕэ сылдьарын ыйыталастылар. Ытык кырдьаҕас Карл Варламов ходуһа алдьанарын, суол оҥоһулларыгар, үөһээ бөһүөлэги уунан хааччыйарга үрэҕи быһыттыырга баҕатын биллэрдэ. Нэһилиэк чугаһынааҕы сирдэри федеральнайтан муниципальнай сиргэ көһөрүүнү, инникитин нэһилиэкпит төһө сайдар кыахтааҕын ыйытта уонна кэлбит дьоҥҥо махтанна.
Култуура киинин дириэктэрэ Анна Харитонова туризм сайдарыгар ханнык бырагыраама, Владимир Кычкин булт лиссиэнсийэтин ыларга уустуктар баалларын ыйда.
Бөлөх салайааччыта, улууска тыа хаһаайыстыбатын кураатарынан салгыы үлэлиир Петр Иванович Уус Алдан улууһугар өр сылларга үлэлээбит буолан бу эҥэр туох кыһалҕалар баалларын өйдүүбүн диэтэ. Ростелеком сибээһин ыалларга киллэрии боппуруостарыгар үлэлэһэллэригэр сүбэлээтэ. Үөрэх министиэристибэтиттэн алын сүһүөх кылаас учуутала, билигин оскуола-саад иитээччитэ Туяра Кычкинаҕа Махтал сурук туттарда.
Отчуоту истэ 27 киһи кэлбит.
Марелла Баишева.
