Алтынньы 11-28 күннэригэр Мэҥэ Хаҥалас улууһуттан анал байыаннай дьайыы ыытылла турар сирдэригэр, чуолаан, Херсон, Запорожье, Ростов, Курскай уобаластарга уонна Донецкай, Луганскай норуодунай өрөспүүбүлүкэлэргэ биир дойдулаахтарбытыгар чугас дьоннорун кэһиилэрэ, улуус дьоно-сэргэтэ, уопсастыбаннаһа, тэрилтэлэрэ, биирдиилээн урбаанньыттара хомуйбут гуманитарнай көмөлөрө тиксэрилиннэ.
Малы-салы тиксэриигэ «Мэҥэ Хаҥалас улууһа» МТ дьокутааттарын сэбиэтин бэрэссэдээтэлэ Иннокентий Андросов, улуус биир кэлим диспетчерскэй сулууспатын начаалынньыга Афанасий Максимов, 1-кы Баатара нэһилиэгин баһылыга Петр Андросов, 1-кы Наахара нэһилиэгин баһылыга Иннокентий Исаков, Мэҥэ нэһилиэгин баһылыга Александр Куприянов, Тараҕай нэһилиэгин баһылыга Юрий Порядин, Дьаҥхаады нэһилиэгин баһылыга Василий Стручков уонна Аллараа Бэстээхтэн олохтоох дьокутаат, балаҕан ыйа саҕаланыаҕыттан ДНР Новоазовскай куоратыгар тэриллибит Саха сирин тирэх пуунугар үлэлии сылдьар Владимир Гарькун сырыттылар.
Дэлэгээссийэ икки аҥыы арахсан, хас да хайысханан сылдьан биир дойдулаахтарбытыгар тиэхиньикэлэри, дрону утары туттуллар тэриллэри (РЭБ), о.д.а. малы-салы, таҥаһы-сабы уонна тоҥоруллубут эти, бурдуктан аһы-үөлү, ыһаарыламмыт собо балыгы тиксэрдилэр. Кинилэр байыастары үгүстэрин сирэй көрсөн кэпсэтэн, туһааннаах көмөлөрү, кэһиилэри туттардылар.
Улууспут дэлэгээссийэтэ ДНР Новоазовскай куоратыгар Саха сирин тирэх пуунугар Ил Дархан Айсен Николаев гуманитарнай көмөнү_ анал тиэхиньикэни тиэрдэ сырыттаҕына көрсүбүттэр.
Дойду көмүскэлигэр сылдьар уолаттарбыт биир дойдулаахтарын көрсөн, баһыылкалары тутан, дойдуларын сонунун истэн үөрбүттэрин туһунан төрөппүттэригэр тиэрдэллэр, чугас дьонноро махталларын ыыталлар.
Марелла Баишева.
