Олунньу 11 күнүгэр СӨ судаарыстыбаннай былааһын толорор уорганнарын отчуотун иккис бөлөх Дойду нэһилиэгиттэн саҕалаата.
Олохтоохтору кытта Бырабыыталыстыбаттан СӨ Тыа хаһаайыстыбатын миниистирин солбуйааччы Николай Афанасьев салайыытынан СӨ Доруобуйа харыстыбалын миниистирин солбуйааччы Надежда Федорова, СӨ култуураҕа уонна духуобунай сайдыы министиэристибэтин профессиональнай ускуустуба уонна духуобунай сайдыы отделын салайааччытын солбуйааччыта Майя Ермолаева, СӨ экологияҕа, айылҕаны туһаныыҕа уонна ойуур хаһаайыстыбатын миниистэрин солбуйааччы Лука Сафонов, «Якутскгеология» АО дириэктэрин солбуйааччы Илья Попов, улуус баһылыгын бастакы солбуйааччыта Василий Михайлов, оройуон дьокутааттарын Сэбиэтин бэрэссэдээтэлэ Иннокентий Андросов уонна улуус управлениеларын салайааччылара, солбуйааччылара үлэлээтилэр.
Нэһилиэккэ Николай Степанович өрөспүүбүлүкэҕэ ааспыт сыллааҕы үлэни, ситиһиилэри сырдатта, кэлбит сыл соруктарын билиһиннэрдэ.
Олохтоохтор үүтү туттарыы сыанатын, нэһиэлиэк ис өртүнээҕи уонна федеральнай тыраассаҕа тахсар суол оҥоруутун, киинтэн ититии ситимигэр холбонуу, ыарахан ыарыыттан эми атыылаһарга туох көмө, оттуур алааһы ыларга ханнык ньыма баарын, «КлиКра сокуонун» туһунан ыйыталастылар.
Дойдулар саҥа үлэһиттэргэ эбии уопсай дьиэ тутуллуутун уонна байыаннай дьайыыга барар дьоҥҥо Саха сиригэр бэлэмниир дьаһал наадатын туруорустулар. Отчуокка олохтоохтортон 34 киһи кытынна.
Иван Лукин
