Степан Андреев, педагогическай үлэ бэтэрээнэ, Майа олохтооҕо:
‒ Дойду баһылыгын пресс-кэмпириэнсийэтин уонунан мөлүйүөн киһи көрдөҕө, иһиттэҕэ. Кини аһаҕас эпииргэ олорон дьону-сэргэни кытары 2001 сылтан алтыһан кэллэ. Арай былырыын 2022 сылга ыытыллыбатаҕа. Бу сырыыга 4 чаас 4 мүнүүтэ устата барбыт быһа эпииргэ Бэрэсидьиэн суруналыыстар уонна Арассыыйа олохтоохторун 67 боппуруоһугар эппиэттээтэ. Манна байыаннай дьайыы, онон сибээстээн байыннай хомуур (мобилизация), дойду экэниэмикэтин, социальнай, доруобуйа харыстабылын, атын дойдулары, ол иһигэр Кытайы, арҕаа дойдулары кытары сыһыан, сөмөлүөт оҥоһуутун уонна аптамабыылынай тырааныспар, Уһук Илин (Дальний Восток) сайдыытын сүрүн хайысхаларын, 2024 сылга Парижка ыытыллыахтаах олимпийскай оонньууларга кыттыы уо.д.а. боппуруостар уонна хоруйдар иһилиннилэр. Ол быыһыгар куурусса сымыытын сыаната лаппа ыараабытын, Москва-Краснодар хайысхатынан сөмөлүөт сырыыта сөхсүтүллэрин, урукку БАМ о.д.а. тустарынан көтөҕүллүбүт кыһалҕалар таарыллан аастылар.
Бэрэсидьиэн 2024 сылтан хамнас алын кээмэйэ (МРОТ) 18,5 % үрдүөхтээҕин санатта. Ол аата Сахабыт сирин киин өртүгэр 48105 солкуобай, хоту улуустарга 53878 солкуобай буолуохтааҕа күүтүллэр. Салгыы Арассыыйа бурдук үрдүк үүнүүтүн ылбыт пиэрмэрдэргэ махталын эттэ.
Күн-түүн үүнэ, үрдүү турар сыана, тарыып ордук аҕам саастаах аҥардас биэнсийэҕэ эрэ олорор дьону олус долгутарын дойдубут олохтоохторо тиэртилэр.