Дойду Бэрэсидьиэнэ тыа хаһаайыстыбатыгар бырагыраама оҥорорго сорук туруорда, олохтоох оҥорон таһаарыыга болҕомто салгыы сайдыаҕын мэктиэлээтэ

Егоров Михаил Михайлович,

Саха Өрөспүүбүлүкэтин тыатын хаһаайыстыбатын туйгуна:

 

— Арассыыйа Бэрэсидьиэнэ Владимир Путин Федеральнай Мунньахха анаан этиитин дьон барыта сэҥээрдэ буолуохтаах. Этии 2030 сылга тиийэ дойдубут кэскиллээх сайдыытын бырагыраамата диэххэ сөп.

Тыа сирин олохтооҕун уонна тыа хаһаайыстыбатын исписэлииһин быһыытынан бэйэбэр сыһыаннаах этиилэри кэтэстим. Ордук эрэгийиэннэр бүддьүөккэ иэстэрин 3 гыммыттан 2-тин сотон, онтон ордор үбү олох таһымын салгыы үрдэтиигэ ыытар наада диэбитэ үөртэ. Оҥорон таһаарыы үлэтигэр каадырдар оруолларын, тиийбэттэрин бэлиэтээн туран каадыры үөрэтиигэ, иитиигэ болҕомто ууруллан, үөрэх ситимин баазатын тупсарыыга үбүлээһин көрүллүө диэбитэ кэскиллээх дьаһал. Билим ситиһиилэрин, аныгы технология, автоматизация, цифровизация олоххо киириэхтээҕин тоһоҕолоон эппитэ тыа хаһаайыстыбатыгар эмиэ чопчу сыһыаннаах, аныгы ирдэбиллэр буолбуттарын туоһулуур. Кыраныысса таһыттан киллэриллэр ас бородууксуйатын аҕыйатыы олохтоох оҥорон таһаарыыга болҕомто салгыы сайдыаҕын мэктиэлиир.

Атын да салааларга улахан үлэлэр былааннаммыттар, онно үтүмэн элбэх үп көрүллүбүтэ, тыа хаһаайыстыбатыгар бырагыраама оҥорорго сорудах туруорбута дойду инники сайдыытыгар, туох баар уустуктары аахсыбакка, эрэли үөскэтэр.