Олунньу 13 күнүгэр үһүс отчуоттуур бөлөх Догдоҥо нэһилиэгэр сырытта.
Олохтоохтор ыйытыыларга бородуукта, гаас, электроуот, уматык сыаната тоҕо күн-түүн үрдэтиллэрин, култуура-успуорт киинэ хаһан киирэрин, бөһүөлэккэ киинтэн кыһыҥҥы уу ситимин, тыа хаһаайыстыбатыгар кэтэх сүөһүлээхтэргэ тиэхиньикэ ыларга көмө ылыы, Төҥүлү суола салгыы аспаалланыытын боппуруоһун, бэйдиэ ыты суох гыныыга тоҕо сокуон киирбэтин, ынахха бэриллэр көмө харчыта сотуллубута охсуулааҕын таарыйдылар.
Тыл эппиттэртэн Иван Новгородов: «Улууска тырааныспар тэрилтэтигэр көмө харчы бэриллибэт, ол гынан баран нэһилиэнньэ туһугар оптуобус сырыыта баар буолуохтаах.
Тутууга олохтоох дьоммут үлэлээбэт буолбуттара соччото суох, уруккулуу ситимҥэ киирэн ыччаты тутууга, олоххо наадалаах оробуочай идэлэргэ үөрэтиэҕиҥ, үлэлээх буолалларыгар ирдэбили туруоруоҕуҥ. Алтай омуктар курдук Саха сиригэр фармацияны сайыннарыаҕыҥ, эмпит сыаната наһаа ыарахан», — диэн ыҥырда.
«Земский доктор» курдук «Земскэй бэтэринээр» бырагыраама баар буоларын, бэтэринээр хамнаһа үрдэтиллэрин туруорустулар. Сүөһү аҕыйааһынын туһунан санааларын үллэһиннилэр. Тэрээһиннээх уонна кэтэх хаһаайыстыба диэн араарбакка тэҥҥэ сайыннарарга эттилэр. Тыа сиригэр ыччат олохсуйбат буолбута мунаардар, дьон олоҕун тупсарарга өрөспүүбүлүкэ салалтата санаатын уурарга уолдьаспыта бэлиэтэннэ.
Марфа Птицына.
