Ахсынньы 10 күнүгэр Догдоҥо нэһилиэгэр оскуолабыт уонна уһуйааммыт үбүлүөйдэрэ буолуохтаахтар. Үбүлүөйгэ бэлэмнэнии чэрчитинэн, сэтинньи 9 күнүгэр оскуолабытыгар «Туллукчаан» уһуйаан кэлэктиибин аахсыйа-кэнсиэрэ ыытылынна.
Көрөөччүлэри уһуйаан үлэһиттэрэ алгыстаах алаадьынан көрүстүлэр. Кофе-брейк үлэлээтэ. Кэлбит дьону түмэн, тэрээһин оһуокайтан саҕаланна. Уһуйаан иитээччитэ Аэлита Карамзина, култуура киинин үлэһитэ Николай Новгородов‒Сиэрдээх Сэһэн оһуокайы төрдүттэн туттулар. Оһуокайга барыта сэттэ уонча улахан дьон, уонча оҕо кытынна. Кэнсиэри уһуйаан иитээччитэ Мария Захарова ыытта, кэнсиэргэ иитээччилэр, иитиллээччилэр, култуура киинин үлэһиттэрэ, «Сарыада» үҥкүү бөлөҕө, «Догдоҥо бэтиэхэлэрэ», «Кыталык» норуодунай үҥкүү ансаамбыла о.д.а. кыттыыны ыллылар. Догдоҥо нэһилиэгин дьаһалтатын баһылыга Петр Сивцев эҕэрдэлээтэ уонна нэһилиэкпитигэр үөрэҕирии ситимигэр саҥа сонун сүүрээннэри, былааннары, оскуола выпускниктарын, уһуйаан иитиллээччилэрин кытары үбүлүөйгэ кэпсэтии, инникигэ былааннары, соруктары сүбэлэһэн ылынарга баҕатын эттэ. Оскуола дириэктэрэ Ким Шахурдин уһуйаан кэлэктиибигэр Махтал суругу туттарда.
Кэнсиэр кэмигэр киирии билиэттэринэн сүүйүүлээх бириистэр (хаан, эт арааһа, тыл, күөх луук, собо, кыһыҥҥы хаһаастар о.д.а.) оонньоннулар. Аахсыйа-кэнсиэргэ киирбит үп-харчы уһуйаан үбүлүөйдээх тэрээһинигэр ананыаҕа. Түмүккэ «Туллукчаан» салайааччыта Аксинья Морозова кыттыбыт, кэлбит дьоҥҥо, нэһилиэк тэрилтэлэригэр махталын тиэртэ. Тэрээһин сыалын-соругун ситэн, дьон, көрөөччүлэр астынан тарҕастылар. Сыллата биһиги уһуйааммыт кырачаан оҕолоро ырыаҕа-тойукка, үҥкүүгэ-хоһооҥҥо сыстан, сайдан иһэллэрэ барыбытын үөрдэр. Оҕолорбутугар, «Туллукчаан» кэлэктиибигэр инникитигэр даҕаны ситиһиилэри, саҥа саҕахтары, айымньылаах үлэни баҕарыаҕыҥ.
Култуура киинин дириэктэрэ Айталина Иванова
