Майатааҕы “Түмэн” уопсастыбаннай холбоһук уонна Дьокуускай куорат Губинскай уокуругун бэтэрээннэрэ бииргэ шефтэһэн үлэлииллэр. Түмэннэр анал байыаннай дьайыы кыттыылаахтарыгар элбэх өрүттээх көмөнү оҥороллорун сэргэ, култуурунай тэрээһиннэргэ мэлдьи көхтөөхтүк кытталлар.
Олунньу 9 күнүгэр Майатааҕы “Түмэн” уопсастыбаннай холбоһук Федор Баишев салайааччылаах хамаандата Дьокуускай куорат Светлана Степанова бэрэссэдээтэллээх Губинскай уокуругун бэтэрээннэрин кытта доҕордуу көрсүһүүлэрэ буолла. Түмэннэр Губинскай уокурук бэтэрээннэрин кытта успуорка күрэхтэһиилэрэ быйыл үһүс сылын үрдүк тэрээһиннээхтик ыытылынна. Иһирэх көрсүһүүгэ сандалы тула олорон истиҥ сэһэргэһии кэннэ бэтэрээннэр хаамыскаҕа, хабылыкка, нуучча дуобатыгар итиэннэ волейболга утарыта кииристилэр. Эгил-тэгил киирсии түмүгэр хаамыскаҕа, хабылыкка «түмэннэр» кыайыылаах таҕыстылар, мээчиккэ куораттар ааспыт сылтан бастыыллар. Кыайыылаахтар грамотанан, мэтээлинэн бэлиэтэннилэр.
Уопсастыбаннай палаата чилиэнэ, “Центральнай” киинэ тыйаатырын генеральнай дириэктэрэ Александр Данилов күрэхтэһиигэ успуонсардаан, бэс ыйыгар диэри талбыт киинэлэригэр сылдьарга билиэттэри бэлэхтээбит. Майалартан Дмитрий Колосов хаамыскаҕа, хабылыкка бастаан икки билиэти, Александра Стручкова дуобакка бастаан биир билиэти тутан үөрдүлэр. Сыллата туттарыллар куубагы куораттар илдьэ хаалбыттар.
«Түмэн» аатыттан барбыт 12 бэтэрээн доҕордуу көрсүһүүттэн сэргэхсийэн, кэрэ кэпсээн кэһиилээх үөрэн-көтөн кэлэн, сонуннарын үллэһиннилэр.
Марелла Баишева.
