Улуус баһылыга Дмитрий Тихонов Тумул нэһилиэгэр тыа хаһаайыстыбатын сайдыытыгар үлэлэһэ сылдьар Тимур Десяткин, Егор Гоголев хаһаайыстыбаларыгар үлэни-хамнаһы, кыстыкка киириигэ бэлэмнэрин билсэ сырытта.
Тимур Борисович Десяткин тыа хаһаайыстыбатыгар биир сүрүн салааны — ынах-сүөһү, сибиинньэ эбии аһылыгын оҥорон таһаарыы хайысхатыгар үлэлэһэр. 2021 с. чааһынай урбаанньыт быһыытынан комбикорму оҥорор собуоту арыммыта. Хаһаайыстыбаларга сайаапканан үрдүк хаачыстыбалаах, чэпчэтиллибит комбикорму тарҕатыынан дьарыктанар. Быйылгы дьылга Министиэристибэттэн улууска бурдук соҕотуопкатыгар 502,23 тоннаҕа 3 515 610 солкуобайдаах субсидия көрүлүннэ, кыстыгы этэҥҥэ туоруурга диэн 400 тонна чэпчэтиилээх комбикорм атыыланыахтаах. Кэлэр сылга бу көрдөрүүнү улаатыннарар сорук турар.
Егор Егорович Гоголев биһиги улууска сибиинньэ пиэрмэтин тэринэн үлэлэтэр соҕотох урбаанньыт буолар. Кини үлэтин 2018 с. саҕалаан, билиҥҥитэ сүүрбэччэ төрүүр, 90 эдэр сибиинньэлээх. Ону таһынан 18 сүөһүнү, алта ыанар ынаҕы тутар. Улуустааҕы тыа хаһаайыстыбатын тосхолунан биир мөлүйүөн солкуобайдаах көмө көрүллэн, хотону чөлүгэр түһэрии үлэтин ыыта сылдьар, ахсынньы ыйга түмүктүүр. Инникитин аныгылыы мэхэньисээссийэлээх пиэрмэни туттар былааннаах.
Дмитрий Иванович үлэһит уолаттарга таһаарыылаах үлэни, ситиһиилэри баҕарда.
