Хотун Тѳҥүлүгэ дартска Илин эҥэрдээҕи куубакка
Ахсынньы 22 күнүгэр Тѳҥүлү туонатыгар дартска бастакы Илин эҥэр куубага ыытылынна.
Күрэхтэһиини олохтоох дьаһалта ѳйѳбүлүнэн «Хотун Тѳҥүлү» дартс кулууп (сал. В.Н.Кисиляхов) толкуйдаан, бэлэмнээн, тэрийэн ыытта. Өрөспүүбүлүкэҕэ сэҥээриини ылан эрэр кѳрүҥү ѳрѳ тутааччылар кэлэн илин-кэлин түһүстүлэр. Мэҥэ Хаҥалас, Чурапчы, Уус Алдан, Таатта, Амма дартсменнара бааллар. Уопсайа 80 спортсмен кытынна. Сахабыт сиригэр үксүн дьахталлар, эр дьон диэн арахсан күрэхтэһэр буоллахтарына, бу сырыыга сааһынан 8 бѳлѳх баар, ол аата 8 комплект мэтээл оонньонно. Онон тэрээһиҥҥэ элбэх киһи кыттарыгар кыах биэрдибит. Күрэхтэһиибитигэр быйылгы 4 «ЯДЛ» (якутская дартс лига) суперфиналистара кэлэн оонньооннор күрэхтэһиини үрдүк таһымҥа таһаардылар.
Кэрэ аҥаардарга 40-гэр диэри 6 күрэхтэһээччи баара. Кыайыылааҕынан Нюргуяна Кардашевская (Чурапчы) таҕыста. Иккиһи Тѳҥүлүттэн бэрт тахсыылаахтык оонньоон Варвара Попова хааччынна. Үсүһү ыллылар ‒ Уус Алдантан Айталина Егорова, Сардана Андросова.
40‒49 дылы саастаахтарга тѳрдүѳлэр этэ. Кыайыылааҕынан оонньуу хаачыстыбатынан Уус Алдантан Наталья Титова буолла. Кини биир дойдулааҕа Людмила Странден үрүҥ кѳмүһү түѳһүгэр иилиннэ. Үсүһү (иккилии мэтээл оонньонор) МэҥэХаҥаластан Ольга Назарова уонна Чрапчыттан Ирина Собакина хааччыннылар.
Саастаахтарга 8 кыттааччы чөмпүйүөн аатын былдьаста. Финалга мэҥэ хаҥаластар тахсан быһаарыстылар. Кыайыылааҕынан быйылгы «ЯДЛ» суперфиналистката Наталья Иванова таҕыста, иккис Александра Морозова буолла, боруонса мэтээлгэ Уус Алдантан Людмила Слепцова уонна Чурапчыттан Анна Михайлова тигистилэр.
Эр дьоҥҥо уопсайа 67 киһи күрэхтэстэ. 30-гар дылы саастаахтарга 10 дартсмен баара. Мэтээли барытын Чурапчы эдэр кэскиллэрэ илдьэ бардылар. Чөмпүйүөн – Егор Ефремов, иккис ‒ Эрэл Аммосов, үһүс ‒ Афанасий Федоров, Мичил Сергеев.
30‒39 саастаахтарга 11 кыттааччы ким кыраҕытын быһаарыстылар. Кыайыылааҕынан «ЯДЛ» суперфиналын быйылгы бастыҥа Таатта талыыта Дмитрий Петров таҕыста. Иккис Балыктаахтан тѳрүттээх өрөспүүбүлүкэ чөмпүйүөнэ Ян Говоров буолла. Боруонса мэтээлинэн Уус Алдантан Иван Протопопов, Чурапчыттан Петр Климов наҕараадаланнылар.
40‒49 саастаахтарга 12 дартсмен баара. Кыайыылааҕы быһаарсыы бэрт тыҥааһыннаахтык ааста. Ол курдук Тѳҥүлү эрэлэ Леонид Баишев утарсааччытын Владимир Барашковы (Чурапчы) 4:0 кыайан иһэн, быраҕыыта барбакка ахсааны тэҥнэтэн кэбиһэн «ыалдьааччылары» ууга-уокка түһэрэ сырытта. Онтон быһаарыылаах легкэ таба быраҕан үѳрүүнү-кѳтүүнү олохтоохторго бэлэхтээтэ. Үһүс миэстэни Иван Баишев (Тѳҥүлү) уонна Руслан Карпов (Чурапчы) хааччыннылар.
50‒59 саастаахтарга саамай элбэх дартсмен оонньоото – 17. Кыайыылааҕынан күүтүллүбүтүн курдук өрөспүүбүлүкэ биир бастыҥа – Амматтан тѳрүттээх Руслан Сольжиграсов таҕыста. Үрүҥ кѳмүһү Чурапчы чулуута – Владимир Карпов ылла, үсүһү Майаттан Гаврил Иванов уонна Чурапчыттан Мэхээлэ Илгын үллэһиннилэр.
60-тан аҕа саастаахтарга 12 спортмен чулууну быһаарыстылар. Үһүс миэстэни Мэҥэ Хаҥаластан Вячеслав Слепцов уонна Уус Алдантан Владимир Портнягин ыллылар. Финалга Мэҥэ Хаҥаластан Николай Степанов уонна Чурапчыттан Никифор Максимов тахсыбыттара. Ыһыы-хаһыы ортотугар бэрт эрийсиилээх киирсии ааста. Ким 5 леги (очкону) ылбыт кыайыылаах тахсыахтаах уонна куубак ханна барарын быһаарыахтаах. Онон ити түгэн оонньууга улахан күүркэтиини киллэрдэ. Хас биирдии быраҕыы улахан суолталаах этэ. Кыайыы быраҕыытын Никифор Максимов оҥорон 5:4 ахсаанынан кыайыы ѳрѳгѳйүн биллэ уонна чурапчыларга бастакы Илин эҥэр куубагын күѳрэччи кѳтѳҕѳллѳрүгэр кыах биэрдэ. Иккис мэҥэ хаҥаластар буоллубут, үһүс уус алдан күрэхтэһээччилэрэ ааттаннылар.
Эһиилги күрэхтэһиини чурапчылар ыыталлар. Онон мэҥэ хаҥаластарга бу күрэхтэһии түмүгүнэн сыал чопчуланан үчүгэй бэлэмнээх тиийэр сорук турар.
***
Үөрүүлээх сонунунан бу күрэхтэһиигэ дартс успуорт түмсүүтэ элбэх сыллаах туруорсуу түмүгэр федерация буолары ситистибит. Салайааччынан Ил Түмэн дьокутаата Захар Никитин ананна.
Улууска дартсы 2014 сылга саҕалаабытым. Дартс доруобуйаларынан хааччахтаахтар эйгэлэриттэн, инбэлииттэр успуортарыттан тахсыбыт көрүҥ. Быйыл түмсүү тэриллэн, уон сыл үлэм түмүгэ көһүннэ диэн үөрэбит. Федерация буолан докумуоннаһыы үлэтэ бара турар. Билигин 60 чилиэннээхпит, өссө да эбиллиэхтэрэ турдаҕа. Оҕолор киирэллэрэ ордук этэ, манна сааһыттан хаарчахтааһын суох.
Нэһилиэктэргэ Төҥүлүгэ, Майаҕа ордук дьарыктаналлар. Чугастааҕылар Майаҕа киирэллэр. Дьарыктанар сирбит «Манчаары» успуорт комплекса. Нэдиэлэҕэ биирдэ дьарыктанабыт. Средаҕа киэһэ 17.00‒21.00 чаастарга баарбыт. Сөбүгэр тэриллиилээхпит, улуус дьаһалтата, успуорт салалтата хааччыйаллар. Билигин 2 дартска успуорт маастарыгар хандьыдаат, кэккэ разрядтаахтар бааллар. Саҥа кэлэр дьону үөрэтэбит, сүбэлиибит.
Дьокуускайга кулун тутарга Уһук Илиннээҕи чөмпүйэнээт буолуохтаах, бары күүһү онно уурабыт.
Евгений Птицын,
«Мэҥэ дартс» түмсүү салайааччыта.
