Бүгүн, ахсынньы 22 күнүгэр, Саха Өрөспүүбүлүкэтин Ил Дархана Айсен Николаев Ил Түмэҥҥэ анаан Анал этиитин оҥордо. Айсен Николаев Ил Дарханынан талыллан үлэлиэҕиттэн бу алтыс Анал этиитэ.
Ил Дархан бүгүҥҥү Анал этиитин туһунан «Хара нэһилиэгэ» муниципальнай тэриллии баһылыгыттан Дария Назароваттан бэйэтин санаатын үллэстэригэр көрдөстүбүт.
‒ Саха Өрөспүүбүлүкэтин Ил Дархана Айсен Николаев Ил Түмэн дьокутааттарыгар, Бырабыыталыстыбаҕа, уопсастыбаннаска туһаайан Анал этиитигэр ааһан эрэ сылга ыытыллыбыт үлэ-хамнас түмүктэрин сырдатта уонна үүнэр сылга норуот хаһаайыстыбатын хас биирдии салаатын иннигэр турар тус сыалы-соругу туруорда. Онон бу Анал этиигэ олоҕуран, инники үлэ былаана чопчуланна. Холобур, биһиги, нэһилиэктэр баһылыктара, бэйэбит үлэбит хайысхатын ыллыбыт.
2024 сылы дойдубут Бэрэсидьиээ Владимир Путин Дьиэ кэргэн сылынан биллэрбитэ. Оттон өрөспүүбүлүкэбит Ил Дархана Айсен Николаев бүгүн Анал этиитигэр кэлэр сылы Оҕо сылынан биллэрбитин иһитиннэрдэ. Бу икки сыл дьүөрэлэһэн бэйэ-бэйэлэригэр ситэрсэн биэрэллэр. Хас биирдии омук, норуот хапытаала ‒ оҕо. Кини чөл өйдөөх, эт-хаан өртүнэн доруобай, киэҥ билиилээх-көрүүлээх, сайдыылаах буоллаҕына, ханнык баҕарар норуот кэхтибэт. Онон биһиги Ил Дархаммыт инникиини өтө көрөн сылбытын оҕо аймахха анаабытын саамай сөптөөҕүнэн ааҕабын.
Ил Дархан Айсен Никколаев Анал этиитин түмүгэр саҥа сыл дойдубут инники дьылҕатын быһаарыыга олус эппиэтинэстээх сылынан буоларын тоһоҕолоон бэлиэтээтэ. Кулун тутар ыйга Арассыыйа Федерациятын Бэрэсидьиэнин талыахтаахпыт. Онно өрөспүүбүлүкэбит олохтоохторо биир санааҕа, биир сыалга-сорукка кэлэн дойдубут инники кэскилин туһугар бүттүүн сомоҕолоһон түмсүүлэхтээхтик үлэлиэхтээхпитин-хамсыахтаахпытын ыйда.
