Олунньу 11 күнүнээҕи Бырабыыталыстыба үлэтин отчуота үһүс бөлөххө Дьаҥхаады нэһилиэгинэн түмүктэннэ. Манна мунньаҕы нэһилиэк баһылыга Василий Стручков иилээн-саҕалаан ыытта. Бөлөҕү салайааччы, СӨ сыанаҕа бэлиитикэтин Судаарыстыбаннай кэмитиэтин бэрэссэдээтэлэ Николай Бочков өрөспүүбүлүкэ ситэриилээх былааһын 2024 сыллаах үлэтин экрааҥҥа көстөр чахчыларга олоҕуран киэҥник сырдатта.
Олохтоохтор улууспут баһылыгар Дмитрий Тихоновка, үп миниистирин солбуйааччы Николай Старостиҥҥа, ОДьКХ салайааччытыгар Иннокентий Яковлевка, “Армон” тэрилтэ салайааччыта Ян Новиковка нэһилиэнньэ 100 бырыһыан ититиигэ холбоммутунан махтаннылар.
2018 с. кулууп дьиэ саахалланар туруктааҕынан билиниллэн көтүрүллүөҕүттэн 1200-тэн тахса нэһилиэнньэлээх бөһүөлэк тэрээһиннэри ыытарга култуурунай киинэ суох олороллоруттан долгуйалларын 45 сыл педагогическай ыстаастаах оҕо муусукатын оскуолатын дириэктэрэ Екатерина Винокурова, биэнсийэлээхтэр Раиса Андросова, Анна Винокурова эттилэр.
Үлэ бэтэрээнэ Екатерина Винокурова сопхуос киинэ эрдэхпитинэ нэһилиэккэ барыта баара, билигин тоҕо барытын саптылар, нэһилиэги ортотунан ааһар федеральнай суолу оҥорору оҕолорго кутталлааҕынан утарарын, Марк Чугунов быйылгы сылга өрүһү туоруурга дьону таһар тырааныспар ылыллара былааҥҥа баар дуо, Николай Сокольников кэтэх хаһаайыстыбалартан хортуоппуйу тоҕо туппаттар, тириэньэр Валерий Герасимов улууска дзюдо успуордун сайыннарарга, оҕолор элбэх ситиһиилээхтэрин, интернат тутуутун, Евдокия Плотникова ууну ыраастыыр ыстаансыйа наадатын, анал байыаннай дьайыы кыттыылаахтарыгар туох көмөлөр оҥоһуллаллар, Дмитрий Бубякин өрүһү туоруур федеральнай суолу Маандай сиринэн ыытар хайдах буолуоҕун, арыыга оттонор ходуһалары өртүүр наадатын, элбэх оҕолоох аҕа Алексей Говоров култуура дьиэтин тутуу экэниэмикэ министиэристибэтигэр түмүк экспертизаны ааспакка турарын этиннилэр. Манна уу ылар сиринэн биллэриллибит зонаны бу ыстаатыһыттан көтүттэрэргэ, 1974 с. туруоруллубут уот остоолболоро суулла туралларын, о.д.а. долгуйар боппуруостарын туруордулар.
Киирбит ыйытыктарга бөлөх салайааччыта Николай Владимирович, туһааннаах салайааччылар сиһилии быһааран толору хоруйдары биэрдилэр.
Николай Владимирович үөрэх систиэмэтин сайдыытыгар киллэрбит кылаатын иһин СӨ үөрэҕириитин уонна наукатын министиэристибэтин Махтал суругун “Мичил” оҕо уһуйаанын хаҺаайыстыбаннай чааска сэбиэдиссэйигэр Лена Ивановаҕа, экэниэмикэ министиэристибэтин Махтал суругун өрөспүүбүлүкэ социальнай-экэнэмиичэскэй сайдыытыгар үтүө суобастаах үлэтин, тус кылаатын иһин нэһилиэк дьаһалтатын сүрүннүүр исписэлииһигэр Татьяна Поповаҕа үөрүүлээх быһыыга-майгыга туттарда.
Дьаҥхаадылар бырабыыталыстыба ыытар үлэлэрин биһирииллэрин биллэрдилэр.
Марелла Баишева.
