Тохсунньу тиһэх күнүгэр Дьаҥхаады нэһилиэгин ытык сиригэр саҥа хочуолунай үлэҕэ киирдэ. Итиинэн хааччыйар эбийиэги Ян Новиков салайааччылаах “Армон” ХЭТ үлэҕэ киллэрэн, нэһилиэнньэ мас мастыыртан босхолонон, 100 бырыһыан ититии ситимигэр холбонору ситистэ. Төхтүрү төрүттээбит “Таастаах” уонна “Уйгу” түөлбэлэр олохтоохторо өр сылларга ыра санаа оҥостубут баҕалара туолла.
“Армон” ХЭТ 2016 сылтан нэһилиэктэргэ хочуолунайдары тутуунан дьарыктанан, уопсайа 14 хочуолунайы киллэрбит. 600-тэн тахса ыалы холбоон, 10-тан тахса социальнай эбийиэги сылытан олороллор. Быйыл Төхтүргэ 2,4 мегабайт кыамталаах хочуолунайы туруоран, 40 ыалга ититии холбонно. Итини сэргэ, сылы эргиччи кэлэр тымныы ууну холбоотулар.
Үөрүүлээх күҥҥэ олохтоохтору Саха Өрөспүүбүлүкэтин ОДьКХ уонна энэргиэтикэ миниистирэ Вячеслав Емельянов, улуус баһылыгын бастакы солбуйааччы Василий Михайлов, нэһилиэк баһылыга Василий Стручков, “Армон” ХЭТ салайааччыта Ян Новиков эҕэрдэлээтилэр. Кинилэр хомунаалынай хаһаайыстыба сайдыытыгар өҥөлөрүн киллэрбит, үтүө суобастаахтык үлэлээбит бастыҥ үлэһиттэргэ наҕараадалары туттардылар.
Мэҥэ Хаҥалас улууһун баһылыгын Махтал суругунан Төхтүр хочуолунайын эпэрээтэрдэрэ Владислав Гаврильев, Василий Максимов, Виталий Старков, Лоомтукатааҕы хочуолунайдар аварийнай-диспетчерскэй сулууспаларын силиэсэрэ Алексей Леонтьев, улуус дьокутааттарын сэбиэтин бэрэссэдээтэлин Бочуоттаах грамотатынан “Армон” ХЭТ Төхтүрдээҕи учаастагын начаалынньыга Владимир Максимов наҕараадаланнылар.
Олохтоохтору уонна ыалдьыттары орто уонна оҕо ускуустубатын оскуолаларын үөрэнээччилэрэ ырыанан-тойугунан эҕэрдэлээтилэр.
Тыа сирин үлэһит дьоно сынньалаҥнык олороругар сөптөөх усулуобуйа тэриллэн иһэрэ барыбытын үөрдэр.
Марелла Баишева.