Дьабыыл оскуолатыгар Тиһэх Чуораан чугдаарда

Дьабыыл нэһилиэгин Н.В.Петров аатынан агро хайысхалаах орто оскуолаҕа бүгүн, ыам ыйын 25 күнүгэр, тиһэх чуораан чугдаарда.

Быйылгы үөрэх дьылыгар оскуола-саадка барыта 61 оҕо үөрэннэ.

Анастасия Винокурова салайааччылаах 4-с кылааһы 5 үөрэнээччи, Лариса Ковлекова салайааччылаах 9-с кылааһы 6 үөрэнээччи, Фекла Аммосова салайааччылаах 11-с кылааһы 8 үөрэнээччи бүтэрдилэр.

Тиһэх чуораан үөрүүлээх күнүнэн оскуола кэлэктиибин, оскуоланы бүтэрээччилэри уонна  үөрэнээччилэри улуустан үөрэх управлениетын информационнай-аналитическай салаа сүрүннүүр исписэлииһэ Айыына Неустроева, биир кэлим дьуһуурунай диспиэтчэр сулууспатын салайааччы, нэһилиэк кураатара, биир дойдулаахтара Афанасий Максимов, оскуола дириэктэрэ Василий Петров, педагогическай үлэ бэтэрээнэ, быйыл оскуоланы бүтэрээччилэргэ уһуйааны бүтэртэрбит Валентина Стручкова, бастакы учууталлара Татьяна Курчатова, кылаас салайааччылара Анастасия Винокурова, Фекла Аммосова, бэтэрээн учууталлар, мэссэнээттэр итиэннэ төрөппүттэр  эҕэрдэлээтилэр, алгыс маанытын анаатылар.

Мэҥэ Хаҥалас улууһун баһылыга Дмитрий Тихонов Махтал суругунан ыччаты иитиигэ-үөрэтиигэ үтүө суобастаах үлэлэрин иһин учууталлар Мария Иванова, Любовь Жиркова, үөрэх управлениетын грамотатынан Лариса Ковлекова, Фекла Аммосова, Василий Сергучев наҕараадаланнылар.

Улуустааҕы “Кэрэли” киин “Сүүтүкчээн” куруһуогар сылдьыбыт 11-с кылааһы бүтэрэр Сааскылаана Стручковаҕа тус ситиһиилэрдээх бүтэрбитин туоһулуур сибидиэтэлистибэ уонна “Кэскил” реабилитациялыыр киин грамотата 9-с кылааһы бүтэрэр Вова Петровка,  11-с кылааһы бүтэрэр Намыына Климовскаяҕа, Кирилл Калачевка үөрүүлээх быһыыга-майгыга туттарылыннылар.

Үтүө үгэс быһыытынан оскуоланы бүтэрээччилэргэ сыллата Дьабыыл сириттэн төрүттээх мэссэнээттэр истипиэндьийэлэрэ туттарыллар.

Нэһилиэк Бочуоттаах гражданина Татьяна Петровна Пермякова аатынан истипиэндьийэни Уруйдаана Алексеева, Намыына Климовская туттулар. Педагогическай үлэ бэтэрээнэ Фекла Романовна Игнатьева аатынан истипиэндьийэ Кирилл Калачевка, СӨ үтүөлээх учуутала Матвей Антонович Тимофеев аатынан истипиэндьийэ Гриша Свешниковка, “Үлэ Кыһыл Знамята” уордьан кавалера, РСФСР үтүөлээх учуутала Иннокентий Егорович Сергучев аатынан истипиэндьийэ Кеша Алексеевка туттарылынна. Сааскылаана Стручкова Мэҥэ Хаҥалас улууһун Бочуоттаах олохтооҕо Антон Ильич Борисов-Улахан Бачылла аатынан истипиэндьийэ, Марианна Борисова РФ үтүөлээх учуутала Степан Васильевич Баягантаев аатынан истипиэндьийэ хаһаайыттарынан буоллулар. Аҕа дойду Улуу сэриитин, успуорт, үлэ бэтэрээнэ Алексей Николаевич Березкин аатынан истипиэндьийэнэн Ангелина Стручкова, сыл бастыҥ төрөппүтүгэр ананар сэрии уонна үлэ бэтэрээнэ Михаил Яковлевич, үлэ бэтэрээнэ Марфа Софроновна Артемьевтар истипиэндьийэлэринэн Марианна Уваровна Борисова, лингвист, тюрколог Гаврил Васильевич Баишев-Алтан Сарын аатынан истипиэндьийэнэн 8-с кылаас үөрэнээччитэ Ренат Аммосов наҕараадаланнылар.

Оскуоланы бүтэрэр оҕолор судаарыстыбаннай эксээмэннэрин ситиһиилээхтик туттаран, талан ылбыт үөрэхтэригэр киирэн үөрэнэн, идэлээх дьон буоллуннар.

 

Марелла Баишева.