Д.Ф.Ходулов аатынан Майатааҕы норуодунай тыйаатыр 61-с сезонун ахсынньы 13 күнүгэр Саха Өрөспүүбүлүкэтин бөдөҥ судаарыстыбаннай уонна уопсастыбаннай диэйэтэлэ, талааннаах салайааччы, өрөспүүбүлүкэ норуотун хаһаайыстыбатын үтүөлээх үлэһитэ, Мэҥэ Хаҥалас улууһун бочуоттаах гражданина, Мэҥэ Хаҥалас улууһун бастакы баһылыгынан үлэлээбит Василий Васильевич Скрябин туһунан “Бастакы” испэктээгинэн арыйда.
Испэктээх режиссера СӨ култууратын туйгуна Данил Осипов, драматург Утум Захаров. Сүрүн оруолу, Василий Скрябин оруолун Ф.Г.Охлопков аатынан Майа орто оскуолатын завуһа, история учуутала Михаил Самсонов толордо. В.В.Скрябин олоҕун аргыһын, Фаина Илларионовна оруолун Саргылаана Сивцева, эмиэ бу оскуола учуутала толордо.
Испэктээккэ М.Е.Николаев, С.З.Борисов, В.П.Ларионов оруолларын артыыстар итэҕэтиилээхтик оонньоотулар. Испэктээккэ анаан саҥа ырыа суруллубута. Михаил Тимофеев хоһоонугар ырыа мелодиятын Д.Ходулов аатынан норуот айымньытын дьиэтин уус-уран салайааччыта Линда Захарова айбыта уонна толордо. Испэктээк муусукатын Алексей Ефимов, Д.Ходулов аатынан норуот айымньытын дьиэтин үлэһитэ суруйда. Маассабай сыаналарга В.В.Скрябин биир дойдулаахтара – Ходоро нэһилиэгин олохтоохторо, В.В.Скрябин аатынан Чүүйэ орто оскуолатын кэлэктиибэ кыттыыны ыллылар.
Испэктээк премьератыгар В.В.Скрябин олоҕун аргыһа Фаина Илларионовна, оҕолоро, сиэннэрэ, аймахтара, биир дойдулаахтара, Ил Түмэн дьокутааттара Андрей Находкин, Захар Никитин, СӨ култуураҕа уонна духуобунай сайдыыга миниистирэ Афанасий Ноев, улууспут, Майа сэлиэнньэтин, Ходоро, Нөөрүктээйи нэһилиэктэрин салайааччылара уонна В.В.Скрябины чугастык билэр бииргэ үлэлээбит дьонноро Матвей Мучин, Люлия Григорьева, Яков Яковлев, Афанасий Мигалкин ыҥырыллан көрдүлэр.
