Ахсынньы 11 күнүгэр улуус баһылыга Дмитрий Тихонов 2024 сыллааҕы үлэтин отчуота Чыамайыкы олохтоохторугар туруорулунна. В.И.Кононов аатынан «Тамма» элбэх хайысхалаах култуура киинигэр муһуннулар.
Сыл устата улуус үрдүнэн бары хайысхаларыгар барбыт үлэлэри уонна кэлэр сыл соруктарын нэһилиэк 60 олохтооҕо иһиттилэр, сэргээтилэр. Дмитрий Иванович байыаннай дьаайыга сылдьар дьоммутугар Чыамайыкы дьоно-сэргэтэ күүс-көмө буолалларыгар махтал тылларын тиэртэ.
Норуот дьокутаата Андрей Находкин билигин үгүс дьону долгутар «Кликра сокуонун» туһунан нэһилиэнньэҕэ быһааран улаханнык долгуйар наадата суоҕун санатта.
Нэһилиэккэ электроуот хаабыла уонна остуолбалара саҥардыллара, сылгыларга ыарыыттан харыстыыр быһыыны туруоруу, көһө сылдьан үлэлиир мобильнай быраастар биригээдэлэрэ кэлиитин ыйыттылар. Алмаас хостооһунун боппуруоһугар бэйэбит уонна айылҕабыт туһугар харыстанар көмүскэли толкуйдуурга, оскуола учууталларыгар саҥа уопсай дьиэ, улуустааҕы култуура уонна успуорт эстэпиэтэтигэр уларыйыы наадатын эттилэр. Көҥүл сылдьар ыттарга туох миэрэ, от үлэтигэр ханнык көмө, «Земский учитель» бырагыраама, туттарыллыбыт үүт харчытын иэһин, лааҕыр арыйарга туох көмө баарын туоһуластылар.
Отчуоттуур бөлөххө Дмитрий Иванович, нэһилиэк баһылыга Александр Захаров, СӨ Ил Түмэн Судаарыстыбаннай Мунньах сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ Андрей Находкин, улуус дьокутааттарын сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара, солбуйааччылары, исписэлиистэрэ маны тэҥэ улуус дьокутаата Михаил Масаха кыттыыны ыллылар.
Иван Лукин.
