Ахсынньы 21 күнүгэр Мэҥэ Хаҥалас улууһун Чыамайыкы нэһилиэгэр Арассыыйаҕа дьиэ кэргэн, Саха сиригэр оҕо саас сылыгар аналлаах «Чыамайыкы ыҥырар» дьиэ кэргэнинэн эр дьоҥҥо аһаҕас волейбол күрэҕэ ыытылынна.
Күрэх тэрийээччилэрэ Максимовтар, Филипповтар киэҥ аймах убайдарын Петр Евсеевич Устинов идиэйэтин иилээн-саҕалаан ыыттылар. Күрэх сүрүн ирдэбилинэн оонньуу былаһааккатыгар 1 оскуола оҕото, 2 ыччат, 2 орто саастаах уонна 1 бэтэрээн баар буолуохтаахтар. Күрэххэ Хорообуттан Скрябиннар, Чыамайыкыттан Захаровтар (Биэйкэлэр), Захаровтар, Ивановтар-Романовтар уонна тэрийээччи хамаанда Максимовтар-Филипповтар күрэстэстилэр.
Сүрдээх тыҥааһыннаах киирсии түмүгүнэн 3-с миэстэни Захаровтар (5 тыс, оскуола), 2-с миэстэни Максимовтар-Филипповтар (10 тыһ солк. ОДьКХ, Тамма СКПХ кэлэктиибэ) уонна эрэллээх 1-кы миэстэни Захаровтар (Биэйкэлэр) С.Н.Михайлов аатынан оскуола кэлэктиибэ туруорбут 15 тыһыынча солкуобай суумалаах бирииһи ылары ситистилэр.
Ону таһынан «Инникилээх оонньооччу» анал ааты Вильям Иванока (Захаровтар-Биэйкэлэр хамаанда) Дмитриевтар дьиэ кэргэн олохтообут 8 тыһыынча суумалаах ДНС маҕаһыынтан сэртипикээт тутта.
«Бастыҥ сибээстээччи» анал ааты Иван Прибылых (Хорообуттан Скрябиннар хамаандаларыттан), «Бастыҥ кимэн киирээччи» анал ааты Роберт Романов (Ивановтар-Романовтар), «Бастыҥ оонньооччу» анал ааты Георгий Карманов (Максимовтар-Филипповтар), «Лучший защитник» анал ааты Николай Макаров (Захаровтар) ыланнар, успуорду өрө тутар дьиэ кэргэннэр олохтообут харчынан бириистэрин туттулар.
Куоластааһын түмүгүнэн «Көрөөччү биһирэбилэ» анал ааты Саша Филиппов ылан Максимовтар (Силиикэбистэр) олохтообут бириистэрин – 5000 солкуобайы харчынан ылла. Аймахтарбыт Кармановтар олохтообут «Кэскиллээх оонньооччу» анал ааты ылан Артем Прокопьев утуйар мөһөөччүгүнэн наҕараадаланна. Бу анал аакка тиксибит 7 киһиэхэ туспа Александр Филиппов уолунаан Николайдыын 10 тыһыынча солкуобай туруораннар, бааттаах тарбахтаахтар сэрэбиэйдэригэр бириис Роберт Романовка тигистэ.
Олохтоох дьаһалта үлэһиттэрэ олохтообут 5000 солкуобайдаах уонна тыа хаһаайыстыбатын управлениета туруорбут 6000 солкуобайдаах «Сардаана» маҕаһыынтан сэртипикээттэрэ Хорообуттан Скрябиннар аҕа баһылыктарыгар Владимир Васильевич Скрябиҥҥэ туттарылынна. Урбаанньыт Игорь Афанасьевич Васильев олохтообут 3000 солкуобай суумалаах «Умный дом» маҕаһыынтан сэртипикээтэ Александр Петрович Захаровка (Биэйкэлэр бэтэрээннэрэ) тигистэ.
Ону таһынан бастаабыт хамаанда чилиэннэригэр эмиэ туһунан сэрэбиэй ыытыллан Юрий Петрович Беляевка (Биэйкэлэр) тигистэ. Өссө төлөпүөнүнэн бастакы эрийэн кэлбиккэ ооньуу ыытыллан, Артем Прокопьевка 5000 солкуобай тигистэ.
Бэлэх манан эрэ бүппэтэ. Вадим Михайлович Федоров тус бэйэтин аатыттан үөрэммит оскуолатыгар баскетбол, волейбол мээчиктэрин уонна сиэккэни бэлэх уунна.
Биһиги, тэрийээччилэр, үгэскэ кубулуйбут «Чыамайыкы ыҥырар» диэн суруктаах, араас көлүөнэ мээчикситтэрдээх 2х7 миэтэрэ усталаах баннеры эмиэ спорсаалабытыгар бэлэх ууннубут.
Аймаҕынан оонньуу элбэх аймаҕы ситимнээн, көрсүһүннэртээн, үтүө түмүктээх буолла.
Тэрээһин кэнниттэн дьон санаатын үллэстэр:
-Чыамайыкылар өрүү бэртээхэй тэрээһини тобулан ыыталлар. Удьуор утума быстыбат.
-Дьэ, кырдьык, бэрт күрэхтэһии буолла. Күүрүүлээх бөҕө, бириис бөҕө. Биир дойдулаахтарбытын, аймахтарбытын биллибит-көрдүбүт. Хорообуттан Ньургун Скрябин аҕата, 3 бииргэ төрөөбүт бырааттара кэлэн оонньоон 4-с миэстэ буоллулар. Аҕаларын кытта кэпсэттим, олох сөҕөн, соһуйан барда. Элбэх да ыччаттардаах эбиккит, аны бары оонньууллар, элбэх да эбиккит, маладьыастар эбиккит диир. Хорообукка маннык тэҥ хас да хамаанданы хомуйбаккын диир. Инньэ гынан үөрэн-көтөн, астынан бардылар.
— Бу оонньуу Максимовтар бииргэ төрөөбүттэрэ Петр Евсеевич идиэйэтинэн, туруорсуутунан ыытылынна. Онон Филипповтар, Максимовтар бэрт холобуру көрдөрдүлэр. Аймахтар сомоҕолоһуулара, бэйэлэрэ да бэлиэтииллэринэн, көрбөтөх аймахтарын көрбүттэр. Онон маннык хамсааһыннары атыттар холобурга ылыҥ. Чыамайыкыга «Дойду дьонунан сураҕырар» диэн бырайыак баар дии, эмиэ оннук тэрээһин тэрийиэххитин сөп.
— Бэртээхэй күрэх буолла. Төһө да кыайтардарбыт, олус диэн астынныбыт. Тэрийбит дьоммутугар Филипповтарга, Максимовтарга барҕа махтал!
Дарияанна Максимова.
