«Чолбон» сурунаал өрөспүүбүлүкэ улуустарыгар ыытар оонньуута ахсынньы 12 күнүгэр «Чолбон. Өй күрэһэ. II улахан оонньуу» Мэҥэ Хаҥалас улууһугар Майа тыа сирин түөлбэтигэр ыытылынна. Оонньууну сурунаал үлэһиттэрэ эппиэттиир сэкирэтээр Туяра Павлова иилээн ыытта, эрэдээктэри солбуйааччы Даниил Макеев, сурунаал үлэһитэ Лилия Иванова дьүүллээтилэр. Оонньуу саҕаланыытыгар «Чолбон» сурунаал эрэдээктэри солбуйааччыта Даниил Макеев сурунаал устуоруйатыттан, билиҥҥи үлэтиттэн билиһиннэрдэ.Мэҥэ Хаҥалас улууһуттан 10 хамаанда кыттыыны ылла. Майаттан 4 хамаанда, Бэдьимэттэн, Чыамайыкыттан, Чүүйэттэн, Томтортон хамаандалар көхтөөх кыттыыны ыллылар. Саха литературатыгар билиини тургутар түөрт түһүмэхтээх оонньуу буолла: 1-кы түһүмэх Саха литературатын төрүттээччилэр, 2-с түһүмэх репрессияламмыт суруйааччылар, 3-с түһүмэх Улуу Кыайыыга сүгүрүйэн, 4-с түһүмэх Аныгы кэм. Оонньуу түмүгүнэн, I миэстэ Даркылаах нэһилиэгиттэн Дарианна, Алгыстан Максимовтар, Елена Архипова хамаандалара кыайыылааҕынан таҕыстылар, II миэстэни Майа тыа сирин түөлбэтиттэн Марфа Птицына, Валентина Аманатова, Антонина Скрябина хамаандалара ылла уонна III миэстэҕэ Майа тыа сирин түөлбэтин олохтоохторо Зиновий, Клара Игнатьевтар кыыстарынаан Ольга Семеновалыын таҕыстылар. Хас биирдии хамаандаҕа сурунаал эрэдээксийэтэ «Чолбон» сурунааллары, кыайыылаахтарга саҥа кинигэлэри бэлэх ууннулар. Улуустааҕы киин бибилэтиэкэ үлэһиттэрэ бэйэбит оҥорбут “Алаас чэйин” хас биирдии хамаандаҕа бэлэх ууннубут. Хамаандалар саха литературатын, суруйааччылар айымньыларын билэллэрин бигэргэттилэр. Көхтөөх кыттыыны ылбыт хамаандаларга махтанабыт. Улуустарга кыайбыт дьиэ кэргэттэр тохсунньу 22 күнүгэр Дьокуускайга полуфиналга күөн көрсүөхтэрэ. Онно кыайбыт үс ыал тохсунньу 24 күнүгэр «Саха» НКИК хампаанньа аһаҕас эфиригэр кылаан кыайыылааҕы быһаарар оонньууга кыттыахтара.
#библиотекамк #чолбонөй #күрэс
