Тохсунньу 15 ‒ 16 күннэригэр Москва куоракка Арассыыйа Бэрэсидьиэнэ Владимир Путин сорудаҕынан тэриллибит Бүтүн Арассыыйатааҕы «Төрүт дойду – Арассыыйа күүһэ» бастакы муниципальнай пуорумҥа Арассыыйа эригийиэннэриттэн барыта 7500 баһылык кэлэн кыттыыны ылла. Ол иһигэр Сахабыт сириттэн ‒ 155 бэрэстэбиитэл.
Бу бэйэни салайыныыга анаммыт дириҥ суолталаах улахан тэрээһин сыала-соруга ‒ Арассыыйаҕа муниципальнай сулууспа сыаннаһын үрдэтии, муниципальнай холбоһуктар үлэлэрин тупсарыы. Пуорум үлэтигэр баһылыктар территориялары сайыннарыыга, олохтоох бэйэни салайыныыга о.д.а. тоҕоостоох боппуруостары ырыттылар, уопуттарын үллэһиннилэр.
«Мэҥэ Хаҥалас улууһа» муниципальнай оройуон баһылыга Дмитрий Тихонов салайааччылаах улууспут дэлэгээссийэтигэр улууспут 10 нэһилиэгин баһылыга киирэн кытынна.
‒ Олохтоох бэйэни салайыныы үлэтигэр үөрүйэхтэри үллэстэр, үлэни сөптөөхтүк тэрийиини ырытыһар «Төгүрүк остуолларга» санаа атастастыбыт, элбэх саҥаны биллибит. Дойдубут лиидэрэ Владимир Путин бэйэтин этиитигэр нэһилиэнньэ олоҕо тупсарыгар, баар кыһалҕалар быһаарыллалларыгар быһаччы дьону кытта үлэлиир муниципальнай былаас үлэтэ улахан оруоллааҕын бэлиэтээн туран ситиһиилэри баҕарда. Сайдыы суола сомоҕолоһууга сытар. Биһиги түмсүүлээх буоллахпытына, Ийэ дойдубут туһугар кэскиллээх үлэ тэриллиэ итиэннэ үтүө түмүктээх буолуоҕа. Онон бу курдук норуоттар доҕордоһууларыгар болҕомто ууруллан, саҥа соруктары ылынарга олугу уурар муниципальнай пуорум – дойду биир бастыҥ тэрээһининэн буолан ааста, ‒ диэн улуус баһылыга Дмитрий Тихонов санаатын үллэһиннэ.
