Бүгүн, ахсынньы 17 күнүгэр, Мэҥэ Хаҥалас улууһун баһылыгын 2024 сыллааҕы үлэтин отчуота Бүтэйдээх нэһилиэгиттэн саҕаланна.
Манна Ил Түмэн дьокутааттара Андрей Находкин, Захар Никитин, улуус сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар. Отчуот мунньаҕын олохтоох баһылык Айаан Чичахов иилээтэ-саҕалаата.
Улуус баһылыга Дмитрий Тихонов кэлиҥҥи 3 сылы тэҥнии тутан 2024 с. отчуотун слайданан көрдөрөн, сиһилии быһааран сырдатта.
Бу кэннэ кыраайы үөрэтээччи, педагогическай үлэ бэтэрээнэ Константин Родионов нэһилиэк кыһалҕаларын туруорсан элбэх ыйытыгы итиэннэ этииилэри оҥордо. Сүрүннээн тыа хаһаайыстыбатынан дьарыктанар улуус буоларбытынан ыччат олохсуйарын ситиһэргэ, сүөһү, сылгы төбөтүн ахсаанын элбэтэргэ, бу инниттэн тэрээһиннээх хаһаайыстыбаны тэрийэр наадатын, онуоха улуус көмөлөһөрүгэр эрэнэрин, оскуолаҕа үлэһит тиийбэтин, элбэх оҕолоохторго бэриллэр сири, култуураҕа уонна успуорка өрөспүүбүлүкэҕэ биир бастыҥ көрдөрүүлээх улуус буоларбытынан, кэлэр өттүгэр Манчаары оонньуулара улууспутугар ыытылларын ситиһэргэ, Слепцов-Баппаай, А.Н.Анисимов ааттарын үйэтитэргэ эттэ. Маны сэргэ, кулууп дьиэтэ улууска биир саамай кырдьаҕас тутуу буоларынан саҥа кулуупка баҕаралларын, Бүтэйдээх-Өлөчөй суола оҥоһулларыгар, Мэҥэ-Боҕуруоскай таҥара дьиэтин саҥардан оҥоһуутун үлэтэ бытааннык барарын, олохтоох мусуой комплексын кэнсиэпсийэтин оҥорорго, үүнэр сылга олохтоох балыыһа 125 сылын туоларынан үбүлүөйдээх тэрээһини былаанныырга этиилэри киллэрдэ. Кини улуус дьаһалтата ыытан кэлбит үлэтин үчүгэйинэн сыаналаата.
Үлэ бэтэрээнэ Давлят Назаров сэбиэскэй кэмҥэ тыа хаһаайыстыбатын сайдыытыгар кылаатын киллэрбитин, оччолорго сүөһү, сылгы ахсаана элбэҕин, үлэ-хамнас күөстүү оргуйарын ахтан-санаан ааста. Кини 90-с сыллартан сүөһү, сылгы ахсаана паай үллэһигин түмүгүнэн аччаабытын, ону чөлүгэр түһэрэргэ кэпэрэтиип тэрийэр наадатын бэлиэтээн эттэ. Маны сэргэ олохтоохтортон бөрө элбээбитин, көҥүллээх булчутунан бултатар уолдьаспытын эттилэр. Туһааннаах салайааччылар киирбит ыйытыктарга толору хоруйдаатылар.
Ил Түмэн дьокутаата Андрей Находкин “КлиКра сокуонун” барылын туһунан, айылҕаҕа сыһыаннаах боппуруостарга сыһыаннаан үлэтин-хамнаһын билиһиннэрдэ. Захар Никитин “Биһиги улууспутун Ил Түмэҥҥэ алта дьокутаат көмүскүүр, бүддьүөт тыырыытыгар үлэлэһэн кэллибит. Каадыр боппуруоһа билиҥҥи кэмҥэ аттаран туруоруу суоҕунан, ханнык баҕарар хайысхаҕа күүскэ турар. Улууспут дьаһалтата өрөспүүбүлүкэ бырабыыталыстыбатын кытта үчүгэйдик үлэлээн, орто анал үөрэхтэргэ тус сыаллаах миэстэлэргэ оҕолору үөрэттэрэр. Манна олохтоох нэһилиэнньэ ханнык каадыр тиийбэтинэн ыччаты бэлэмнээн үлэлэһэргитигэр, Таҥара дьиэтин боппуруоһун архиепископка киирэн туруорсуом” диэн эппитин дохсун ытыс тыаһынан көрүстүлэр.
Отчуоту истэ 51 киһи кэлбит.
Марелла Баишева.
