Тохсунньу 24 күнүгэр улуус баһылыгын 2023 сыллаах үлэтин отчуотун Бүтэйдээх нэһилиэгэр баһылыгы социальнай уонна имиджевай бэлиитикэҕэ солбуйааччы Альбина Григорьева туруорда. Манна Ил Түмэн дьокутаата, сир баайыгар уонна айылҕа боппуруостарыгар сис кэмитиэтин бэрэссэдээтэлэ Андрей Находкин, управлениелар, тэрилтэлэр салайааччылара кыттыыны ыллылар. Мунньаҕы нэһилиэк баһылыга Айаан Чичахов иилээн-саҕалаан ыытта.
Олохтоохтор көхтөөхтүк кыттан нэһилиэктэрин кыһалҕалаах боппуруостарын хото ыйыттылар итиэннэ туруорсар этиилэрин киллэрдилэр.
Олохтоох мусуой дириэктэрэ Константин Родионов, почта сэбиэдиссэйэ Светлана Смолина, үлэ бэтэрээнэ Анна Филиппова, култуура дьиэтин исписэлииһэ Марина Давыдова, оскуола бибилэтиэкэрэ Елена Васильева, “Бүтэйдээх” СХПК бэрэссэдээтэлэ Андрей Слепцов уонна элбэх киһи суругунан ыйытыыларыгар туһааннаах салайааччылар, Ил Түмэн дьокутаата, сир баайыгар уонна айылҕа боппуруостарыгар сис кэмитиэтин бэрэссэдээтэлэ Андрей Находкин толору быһааран биэрдилэр.
Нэһилиэк биир улахан кыһалҕатынан 1965 сыллаахха тутуллубут кулууп буолар. Нэһилиэнньэ саҥа кулууп, оҕо уһуйаана тутуллалларыгар, успуорт саалатыгар өрөмүөн наадатын, Боҕуруоскай таҥара дьиэтигэр чөлүгэр түһэрии үлэтин салгыы ыытарга, Абалаах хайысхатынан хаалбыт 10-ча км суолу оҥорон бүтэрэр наадатын, Саха АССР үтүөлээх учуутала Андрей Николаевич Анисимов аатын улууска үйэтитэргэ үлэлэри ыытарга туруоруста. Маны сэргэ, Сыымахха тутуллуохтаах роботизированнай хотон туһунан сырдатары, Бүтэйдээх кэпэрэтиибин собуота хаһан үлэлиэҕин, соҕотуопкалыыр тэрилтэ үүт туттарааччыларыгар иэһин, пиэрмэрдэргэ бүддьүөт тэрилтэтин үлэһиттэригэр курдук хамнас тоҕо көрүллүбэтин, оттуур сир тиийбэтин, элбэх оҕолоохторго тоҕо сир бэриллибэтин, “Эдэр дьиэ кэргэн” бырагыраама тоҕо бытаанын, 50 сааһын ааспыт соҕотох дьоҥҥо туох чэпчэтии баарын, «Майа-Бүтэйдээх” хайысханан оптуобус сырыытын, “Хаарбах дьиэ” бырагырааманан көһөр дьон атын сиргэ кыбартыыра ылыахтарын сөбүн, Маттаҕа кырдьаҕастарга тутулла турар интэринээт дьиэ туһунан, култуура уонна успуорт быйылгы эстэпиэтэтигэр оскуола оҕолоро тоҕо кыттыбат буолбуттарын, оскуолаҕа физика уонна информатика учууталлара тиийбэттэрин, “Лена-Туора-Күөл” уу турбатыттан Күрдьэх күөлгэ уу бырахтарыы кыаллыа дуо, уот остоолболоро эргэрбиттэрин хаһан уларытыы үлэтэ ыытыллыахтааҕын, уһаайба иһинэн ааһар уот остоолболорун таска таһаартарар, о.д.а. уопсайа 31 долгутар боппуруостарын ыйыттылар.
Отчуоту 46 киһи иһиттэ, ыытыллыбыт үлэни үчүгэйинэн сыаналаатылар.
Марелла Баишева.
