Ыам ыйын 13 күнүгэр «Кыталык» уопсастыбаннай кииҥҥэ инбэлииттэр уопсастыбаларын чилиэннэрэ кыттыылаах спортивнай остуол оонньууларыгар “Вместе за равные возможности” диэн ааттаммыт үһүс чөмпүйэнээт буолан ааста. Бэлиэтээн эттэххэ, бу чөмпүйэнээт “Алмазэргиэнбаан” АО АКБ ыыппыт “Алмазэргиэнбаан 30 үтүө дьыалата” күрэххэ киин бибилэтиэкэ иһинэн “Мегино-ИНТЕЛЛЕКТ” тэрилтэ грант өйөбүлү ылбыт бырайыага буолар.
Бырайыак чэрчитинэн сэттэ спортивнай остуол оонньуутугар (Джакколо стандарт, Матрешка стандарт, Кульбутто спорт, Эластик венге, Керлинг стандарт, Боулинг стандарт, Шаффлборд стандарт) доруобуйаларынан хааччахтаах дьон кыттыыны ыллылар. Күрэх сүрүн сыалынан инбэлииттэр уопсастыбаҕа көхтөөх кыттыыларын сайыннарыы, күүһүрдүү буолар. Грант олоххо киирэрэригэр “Майа сэлиэнньэтэ” тыа сирин түөлбэтин баһылыга Алексей Неустроев оонньуулар Москваттан кэлэр төлөбүрдэрин уйуммутун бэлиэтээбиппит. Чөмпүйэнээти ыытарбытыгар мэссэнээт, урбаанньыт Руслан Федотов, урбаанньыт Дмитрий Катакинов («Талер» маҕаһыын) бириис туруоран күүс-көмө буоллулар. Ол курдук бырайыак үһүс түһүмэҕэ бэрт сэргэхтик, тыҥааһыннахтык ааста.
Күрэх волонтердарынан И.М.Сосин аатынан улуустааҕы киин бибилэтиэкэттэн бырайыак ааптардара Екатерина Дмитриева, Марина Трифонова буоллулар, итиэннэ бибилэтиэкэр Капиталина Игнатьева көмөлөстө.
Киирсии түмүгүнэн Игорь Захаров (ВОС) Кылаан кыайыылааҕынан тахсан мэссэнээт, урбаанньыт Руслан Федотов маҕаһыыныттан 3 тыһыынча солкуобай суумалаах сэртипикээтинэн наҕараадаланна. Иккис миэстэни ылбыт Светлана Матвеева (ВОИ) урбаанньыт Дмитрий Катакинов («Талер» маҕаһыын) туруорбут сылаас суорҕан бирииһин ылла, үһүс миэстэлээх Светлана Пинигина (ВОГ) урбаанньыт Дмитрий Исакович Катакинов («Талер» маҕаһыын) туруорбут атах массаастыырын тутан үөрүүтэ үксээтэ. Төрдүс миэстэни Раиса Никифорова (ВОГ) ылла уонна урбаанньыт Дмитрий Катакинов («Талер» маҕаһыын) туруорбут сис көннөрөр массажерун тутта.
Түгэнинэн туһанан, чөмпүйэнээттэри ыытарбытыгар бириис туруорбут биир дойдулаахтарбытыгар махталбытын биллэрэбит. Кыттааччылар саҥа остуол оонньууларын олус диэн сэргээтилэр.
Марина Трифонова.