Бүгүҥҥү күнтэн улууска Саха Өрөспүүбүлүкэтин судаарыстыбаннай былааһын толорор уорганнарын 2024 сыллааҕы үлэтин нэһилиэнньэҕэ отчуота саҕаланна.
Мэҥэ Хаҥаласка олунньу 11-14 күннэригэр СӨ экономикаҕа миниистирэ, улууспут кураатара Петр Попов салайааччылаах бөлөх, үс хос бөлөххө арахсан, бары нэһилиэктэри хабан олохтоохтору кытта көрсүһэр.
Бастакы күн улууспут кураатарын салайар бөлөҕө Баатара нэһилиэгиттэн үлэтин саҕалаата. Петр Иванович Бырабыыталыстыба ааспыт сыллааҕы үлэтин бары хайысхаларынан наардаан, сыыппараларга-чахчыларга олоҕуран билиһиннэрдэ.
Олохтоохтор нэһилиэккэ «күөх төлөн» кэлэр буолбутуттан олус астыналларын бэлиэтээн туран, аны уунан хааччыллыы боппуруоһа сытыытык турарын ытык кырдьаҕас Иван Ходулов эттэ. Инньэ сэбиэскэй кэмтэн саҕалаан турбут кыһалҕаны санатта, 2000 сыллар саҥаларыгар үлэлэспит геология, экономика, бырамыысаланнас министиэристибэлэрин докумуоннара харалла сылдьарын, баҕар, скважинаны үлэлэтиигэ туһалаах буолаарай диэн, бөлөх салайааччытыгар туттарда.
Ыччаты дойдуга бэриниилээх буолуу тыыныгар иитиигэ сахалартан бастакы Сэбиэскэй Сойуус Дьоруойун Ф.К.Попов аатын сүгэр оскуола кадеттарын ситиһиилэрин, оскуоланы бүтэрбит үгүс ыччат анал байыаннай дьайыыга дойдуларын көмүскүү сылдьалларын этэн туран, кадеттарга интэринээти тутууну оскуола дириэктэрэ Геннадий Макаров туруоруста, бырайыагын оҥоруу саҕаланан эрэрин иһитиннэрдэ.
Вера Баишева нэһилиэккэ уһуйаан тутуутун боротокуолга киллэрэри, Николай Попов Тиэрэ үрэҕи туоруур муостаны тутууну, ыччаты тыа хаһаайыстыбатыгар сыһыарарга, тыа сиригэр олохсутарга судаарыстыба өттүттэн анал бэлиитикэ наадатын, Иннокентий Корякин бөһүөлэк киин уулуссатыгар уот ситимин тирэхтэрэ эргэрэн хапытаалынай өрөмүөҥҥэ наадыйарын, сүөһүнү уулатарга ууну хаайар быһыты тутууну этиннилэр. Дьиэ-уот, хомунаалынай хаһаайыстыба үлэһиттэрин хамнаһа намыһаҕын, нэһилиэккэ уу таһар массыына наадатын, Кыайыы үбүлүөйдээх сылыгар Дьоруой түмэлин муостатын өрөмүөннээһини, истиэндэлэрин саҥардыыны, суолу ыйга иккитэ грейдэринэн көннөрөрү туруорсан Яков Романов эттэ.
Социальнай гаастааһын, хаһаайыстыбалаах дьоҥҥо субсидия курдук тыа сирин олохтоохторугар көрүллэр өйөбүллэргэ ситэ быһаарыллыбатах өрүттэрин Гаврил Санников ырытта. Василий Ходулов норуот дьокутааттара тыа сиригэр элбэхтик сылдьан дьон кыһалҕатын истэр буоллахтарына эрэ сөптөөх сокуоннар ылыллыахтара диэтэ.
Сыымах олохтоохторо маны сэргэ суолу оҥоруу тэтимин түргэтэтии, үүт тутуллар сыанатын үрдэтии, кэтэх хаһаайыстыба тутар дьон сааһырбытынан сүөһү ахсаана аҕыйыыр чинчилээҕин туһунан этиннилэр.
Олохтоохтор хас биирдии ыйытыыларыгар, этиилэригэр бөлөх салайааччытын Петр Попов, тустаах министиэристибэлэр эппиэттээх үлэһиттэрин, улуус баһылыгын Дмитрий Тихонов, нэһилиэк баһылыгын Дмитрий Акимов сиһилии хоруйдарын, быһаарыыларын ыллылар.
Отчуокка норуот дьокутаата Захар Никитин кыттыыны ылла, дьонугар-сэргэтигэр туһаайан туруорсууларын быһаарыыга үлэлэһэргэ бэлэмин эттэ.
Отчуоту истэ 53 киһи кэлбит. Баатара олохтоохторо Бырабыыталыстыба үлэтин биһирииллэрин биллэрдилэр.
Февронья ОХЛОПКОВА.
