Улууска оттооһун хаамыытын тыа хаһаайыстыбатын управлениетын начаалынньыга Иннокентий Семенов иһитиннэрдэ.
— Ааспыт нэдиэлэ түмүгүнэн, 568 тиэхиньикэнэн 789 киһи оттуу киирдэ. 3275 гектар охсулунна, 1123 туонна хомулунна. Былырыын баччаларга 4366 туоннаны оттообуппут, ол эбэтэр быйыл күн-дьыл туругуттан уонна сорохтор хойутаан киирэннэр, 3-4 төгүл хаалан иһэбит.
Бу нэдиэлэ кураан турар чинчилээх, онон күүскэ үлэлиэххэ наада.
Бүгүҥҥүнэн мобильнай биригээдэлэри тэрийиигэ сайаапкалары хомуйуу түмүктэнэр. Барыллаан ааҕыынан, 18 мобильнай биригээдэ тэриллиэхтээх. 2606 туоннаны булуохпут диэн сабаҕалыыбыт.
Үүтү туттарыы 2379 туоннаҕа тэҥнэстэ. Былырыыҥҥы сылы кытта тэҥнээтэххэ, 280 туоннанан аһардыбыт. Былааммытын 110 бырыһыан аһары толорон иһэбит.
Хаалбыт кэмҥэ миэстэтигэр сэрбэйбити барытын охсон, хомуйан, былааны толорор сорук турар.