Бүгүн бүтэйдээхтэр киэн туттар биир дойдулаахпыт, Исландияҕа олорор Александра Гаврильевна Аргунова – Күөрэгэй 85 сааһын туолла.
Кини аҕата, ийэтэ Абалаах сонотуоруйугар үлэлиир кэмнэригэр, 1938 с. ахсынньы 12 күнүгэр Күн сирин көрбүтэ. Аҕата Гаврил Денисович сэриигэ баран 1942 с. сураҕа суох сүппүтэ. Ийэтэ Маайа 4 оҕотун аҥардас ииппитэ.
Кыра эрдэҕиттэн сытыы-хотуу, ырыаһыт кыыс Шура Бүтэйдээх, Төҥүлү оскуолаларын ситиһиилээхтик үөрэнэн бүтэрбитэ. Уус-уран самодеятельность актыыбынай кыттыылааҕа, биһиги оскуолабыт комсомольскай тэрилтэтин сэкирэтээрэ. Оскуола кэнниттэн кылгастык Төҥүлү оскуолатыгар пионербаһаатайдыыр.
1962 с. улахан куонкуруһу ааһан аатырар М.Щепкин аатынан театральнай училище студенката буолар. Кыһаллан үөрэнэн, талааннаах кыыс В.Фомины, С.Емельяновы, З.Багынанованы, А.Кривогорницыны кытары үөрэҕин бүтэрбитэ.
Үөрэнэр сылларыгар Москваҕа үөрэнэр Магнус Йонссон диэн Исландия уолун билсэн, таптаан, студенческай сыбаайба оҥорон ыал буолбуттара. Дьоно, дойдута көҥүллээн, эдэр дьон Исландияҕа тахсан ололсуйбуттара. Күтүөт, Исландия тахсан испит кинорежиссера, 1979 с. Америкаҕа хомолтолоохтук өлбүтэ. Күөрэгэй тас дойдуга сүтэн хаалбакка, 4 оҕотун үлэлээн барыларын дьон оҥортообута. Сахалыы, омуктуу ааттаах Күннэй, Иван, Эрчим, Айаал бары ускуустуба дьоно.
Онтон Күөрэгэйи бэйэтин билбэт киһи Сахатын сиригэр, иккис дойдутугар Исландияҕа аҕыйах буолуохтаах. Исландия биллиилээх артыыһа, режиссера, худуоһунньуга, арт-терапева, норуот ырыаһыта, уопсастыбаннай диэйэтэлэ. Исландия, Дания, Саха сирин айар сойуустарын чилиэнэ. Исландия Арассыыйаны, Саха Өрөспүүбүлүкэтин кытары доҕордоһуу сыһыаннарын төрүттээбит, илдьэ кэлбит киһибит. Онто сыаналанан, СӨ ускуустубатын үтүөлээх диэйэтэлэ, «Гражданскай килбиэн» бэлиэ хаһаайката. Рейкьявикка баар дьиэтэ, Балтика биэрэгэр туттубут балаҕана кини сахалары көрсөр ытык сирдэрэ. Киһи уланнык сөҕөрө, төрөөбүт тылын умнубатаҕа, саха тылын сайыннарарга ыҥырыылара улахан суолталаахтар. Кэнсиэрдэригэр умнуллан хаалбыт сахалыы ырыалары толороро киһини олус долгутар.
Күндү киэн туттар Күөрэгэйбит, 85 ытык сааскынан, дьолу доруобуйаны, дойдуҥ тапталын баҕарабыт! Эппитиҥ, эрэннэрбитиҥ курдук гейзер, океан эньиэргийэтин ылаҥҥын Сахаҥ сиригэр, алааскар кэлэргин кэтэһэбит.
«Сэндиэлэ» түмсүү, түмэллэр.