Бүгүн, тохсунньу 19 күнүгэр, Майаҕа Д.Ф.Ходулов аатынан Култуура киинигэр Илин Хаҥалас улууһугар үөрэхтээһин тэриллибитэ 150 сылыгар олук буолбут Герасим Соловьев туһунан кинигэ сүрэхтэннэ.
Икки томнаах бөдөҥ кинигэ Новосибирскайга 1000 ахсаанынан бэчээттэннэ. Кинигэ бырайыагын кыраайы үөрэтээччи Софья Гаврильевна Дмитриева салайда. Научнай эрэдээксийэтигэр историческай наука дуоктара Андриан Афанасьевич Борисов, архыып докумуоннарын кытта үлэҕэ Октябрина Егоровна Дмитриева оҥордулар. Таҥан оҥордо Марфа Ивановна Птицына. Кинигэ тахсыытын оройуон дьаһалтата сүрүннээтэ.
Кинигэ бырайыагар улуус кыраайы үөрэтээччилэрэ, бибилэтиэкэрдэр, Герасим Соловьев сыдьааннара үлэлэстилэр.
Ороссолуодаҕа улууспутугар үөрэхтээһин аартыгын арыйбыт улуус кулубата Герасим Иванович Соловьев, кини кэминээҕи интеллигенция, быһыы-майгы, ыччаттарын дьылҕатын туһунан кинигэ оччотооҕу кэм туоһута, билиҥҥи кэмҥэ устуоруйаны дириҥэтэн үөрэтиигэ олук буолуоҕа диэн эрэнэбит.
Бу күн — тохсунньу 19 күнүгэр улууска сыллата Үөрэхтээһин күнүн бэлиэтиир туһунан оройуон баһылыга Дмитрий Тихонов илии баттаата.
