Алексей Ильич 1905 с. тохсунньу 10 күнүгэр Моорук нэһилиэгэр төрөөбүтэ. Бүтэйдээх оскуолатын кэнниттэн үөрэнэн, 1929 с. Дьокуускайга учуутал техникумун бүтэрбитэ.
Ити сылтан Табаҕа оскуолатыгар дириэктэринэн үлэлээбитэ. Саҥа оскуола туттаран, сэттэ кылаастаах оскуола оҥорбута. 1937-1940 сс. хоту Абыйга үөрэх салаатын сэбиэдиссэйэ этэ. Дойдутугар эргиллэн кэлэн сэрии иннинэ оройуоҥҥа үөрэх методкэбиниэтин салайбыта, иккиһин Табаҕаҕа дириэктэрдээбитэ.
1942 с. сэриилэһэр аармыйаҕа ыҥырыллыбыта. 1943 с. Ясск-Кишинев эпэрээссийэҕэ сержант Алексей Сосин расчета 10 өстөөх тааҥкатын урусхаллаабыта. Орудие хамандыыра «Хорсунун иһин» мэтээлинэн наҕараадаламмыта. 1943 с. ахсынньытыгар 3 суукка өстөөҕү тутан Кыһыл Сулус уордьанынан бэлиэтэммитэ.
Эйэлээх олоххо эргиллибит буойун учуутал Дьокуускай куорат үөрэҕин салаатыгар үлэлээбитэ. 1947-1950 сс. Усуйаана оройуонугар оройуон сэбиэтин бэрэссэдээтэлинэн талыллан, хоту оройуон сайдыытыгар элбэҕи оҥорбута. Үрдээн, кылгастык да буоллар, бырабыыталыстыба аппараатыгар үлэлээбитэ. 1951 сылтан уонтан тахса сыл социальнай хааччыйыы миниистирин солбуйааччынан таһаарыылаахтык үлэлээбитэ. Нэһилиэнньэ олоҕун-дьаһаҕын тупсарыыга, инбэлииттэри көрүүгэ, интэринээттэри тутууга, кыаммат дьоҥҥо көмөнү олохтооһуҥҥа бэрт элбэҕи оҥорбута. Бочуоттаах сынньалаҥҥа тахсан баран баартыйа архыыбыгар, Ис дьыала министиэристибэтин харабыллааһыҥҥа үлэлээбитэ. Олоҕун тиһэх сылларыгар Е.Ярославскай аатынан мусуой-дьиэ сэбиэдиссэйэ этэ.
Учуутал, буойун, салайааччы 1982 с. өлбүтэ.
«Сэндиэлэ» түмсүү.
Бүтэйдээх.