Олунньу 25 күнүгэр И.Г.Игнатьев аатынан Хара спортивнай орто оскуолатыгар улуустааҕы үөрэҕирии отдела уонна Харатааҕы “Кэрэчээн” уһуйаан тэрийиитинэн, үгэскэ кубулуйбут бэһис төгүлун ыытыллар оскуолаҕа киириэн иннинээҕи саастаах оҕолорго улуустааҕы “Будущие защитники-2025” хамыы күрэһэ таһымнаахтык буолан ааста.
Арассыыйаҕа Дойдуга бэриниилээх буолуу, Саха сиригэр Ийэ дойдуну көмүскээччилэр сылыгар ананна. Күрэс сүрүн сыалынан оҕоҕо төрөөбүт дойдутугар бэриниилээх буоларыгар сыһыаны иитии, хамаанданан үлэлииргэ сатабылы, эти-сиини эрчийии буолар.
Улуус 18 уһуйааныттан 162 иитиллээччи кыттыыны ылла. Дьүүллүүр сүбэҕэ үөрэх управдениетын иитиигэ уонна эбии үөрэхтээһиҥҥэ отделын сүрүннүүр исписэлииһэ Милан Илларионов, уопсай үөрэхтээһин отделын сүрүннүүр исписэлииһэ Феврония Плотникова, “Мэҥэ кэскилэ” патриоттуу иитиигэ тирэх киин салайааччыта, “Оҕо саас сирдьиттэрэ” федеральнай бырайыак улуустааҕы координатора Марианна Монастырева, улуус ис дьыалаҕа уорганын патрульнай-постовой сулууспа сержана Иннокентий Петров, байыаннай дьайыы кыттыылааҕа, сэрии бэтэрээнэ Александр Данилов үлэлэстилэр.
Күрэс улахан уонна кыра уһуйааннарынан икки бөлөҕүнэн ыытылынна. Улахан бөлөххө бастакы миэстэни Майатааҕы “Чуораанчык”, иккиһи Аллараа Бэстээхтэн “Солнышко”, үсүһү Харатааҕы “Кэрэчээн” уһуйааннар хамаандалара ыллылар. Иккис бөлөххө бастакы миэстэ Тыыллыматтан “Күнчээн”, иккис Балыктаахтан ”Звездочка”, үһүс Табаҕаттан “Кэскил” хамаандалар буоллулар. “Ырыаны бастыҥ толоруу” ааты Майатааҕы “Кэнчээри”, “Саамай дьиссипилиинэлээх хамаанда” ‒ Аллараа Бэстээхтэн “Сказка”, “Кыайыыга дьулуурун иһин” ‒ Маттаттан “Ньургуһун”, Майаттан “Мичил”, “Бастыҥ байыаннай пуорма” ‒ Павловскайтан “Лена” уһуйааннар хамаандаларыгар иҥэрилиннилэр. “Бастыҥ хамандыыр” аатын Балыктаахтан “Звездочка” хамандыыра Максим Приблых сүктэ. Кыттааччылар бары Туоһу суругунан, грамотанан, анал аатынан, мэтээлинэн, көһөрүллэ сылдьар куубагы ылан үөрэн-көтөн тарҕастылар.
Күрэскэ кэлэн кыттыбыт хамаандаларга уонна бэлэмнээбит иитээччилэригэр махталбытын тиэрдэбит, инникитин да кэлэҥҥин көхтөөх кыттыыны ыларгытыгар баҕарабыт.
Мария Тастыгина, Харатааҕы “Кэрэчээн” уһуйаан сүрүннүүр иитээччитэ.
