Майа сэлиэнньэтигэр Төрөөбүт төрүт тыл, сурук-бичик күнүгэр аналлаах түөлбэлэр икки ардыларыгар «Саха тыла – өркөн өйбүт» билиини тургутар оонньуу буолан ааста. Тэрээһини Д.Ф.Ходулов аатынан норуот айанньытын дьиэтин исписэлииһэ Елена Варламова иилээн-саҕалаан ыытта.
14 түөлбэ: “Сэбиэскэй”, “Исаев”, “Түмсүү”, “Киин”, “Ураһалаах”, “Академик Ларионов”, “Лесной”, “Лесопуун”, “Мелиораторов”, “Арыы тыа”, “Кэскил”, “Промкомбинат”, “Майа алааһа”, “Маамыкаан” сайаапка биэрэннэр 4-түү киһилээх хаамандалара, уопсайа 56 олохтоох кыттыыны ыллылар.
4 түһүмэхтээх куонкурус олус тыҥааһыннаахтык, долгутуулаахтык ааста, хамаандалар бэркэ бэлэмнэнэн кэлбиттэрэ көһүннэ.
Билиини тургутуу күрэһин түмүгүнэн “Промкомбинат” түөлбэ (сал. Евдокия Шарина) кыайыыны ситиһэн көһөрүллэ сылдьар куубак хаһаайынынан буоллулар.
Иккис миэстэни “Киин” түөлбэ (сал. Светлана Никитина), үсүһү – “Кэскил” түөлбэ (сал. Парасковья Алиева) ыллылар. Кыайыылаахтар мэтээллэринэн, грамотанан уонна өйдөбүнньүк бэлэхтэринэн наҕараадаланнылар.
Бары кыттыбыт хамаандаларга махтанабыт. Өрүү маннык көхтөөх буолуҥ, саха мындырын, тобуллаҕас өйүн тута сылдьыҥ.
Жанна Тумусова,
Майа дьаһалтатын түөлбэни кытары үлэҕэ исписэлииһэ.
