Биир кэлим эксээмэни уонна Сүрүн судаарыстыбаннай эксээмэни тэрийэн ыытыыга сэминээр ыытылынна

Муус устар 1 күнүгэр И.Г.Игнатьев аатынан Хара спортивнай оскуолатыгар Мэҥэ Хаҥалас үөрэҕирии тэрилтэлэрин үлэһиттэригэр Биир кэлим эксээмэни (БКЭ) уонна Сүрүн судаарыстыбаннай эксээмэни (ССЭ) тэрийиигэ уонна тутууга сэминээр ыытылынна. Сэминээргэ оскуола дириэктэрдэрэ, солбуйааччылар, эксээмэни тэрийээччилэр, хамыыһыйа чилиэннэрэ, төрөппүттэр, о.д.а уопсайа 335 киһи кыттыыны ылла.

Пленарнай мунньаҕы улуус үөрэҕин управлениетын начаалынньыга Гаврил Толстяков салайан ыытта. Элбэх оҕолоох улуус буоларбыт быһыытынан, улахан эппиэтинэһи учуоттаан, СӨ Үөрэҕин уонна билимин министиэристибэтин үөрэх хаачыстыбатын кэтээн көрөр киинин дириэктэрин Надежда Попованы улууска сэминээр ыытарга көрдөһөн таһаарбыттар. Маннык тэрээһин хамсык кэнниттэн ыытылла илик эбит.

Надежда Герасимовна биир кэлим эксээмэни ыытыыга саҥа бэрээдэктэри кэпсээтэ. 2023 сыл балаҕан ыйын 1 күнүттэн атын ирдэбиллэр, кыра уларытыылар киирбиттэр. Мэҥэ Хаҥалас улууһа эксээмэни тутарга хайдах бэлэмнээх олороруй диэн боппуруоска тохтоото. Тэрээһиҥҥэ олус наадалаах 79 саҥа сканер ылыллыбытын хайҕаата. Былырыыҥҥы 2023 сыллаах эсксээмэни тутуу түмүктэрин ырытта. Онно көстөрүнэн, икки оскуолаҕа быраабыланы кэһии түгэннэрэ тахсыталаабыт эбит. Итинник алҕастар хатыланар түгэннэригэр, ол оскуолаҕа эксээмэни тутуу тохтотуллуон сөбүн сэрэтэн эттэ. Улуус үрдүнэн информатика уонна география биридимиэтин талыы аҕыйаҕын ыйда. Оҕолорбут ордук обществознание, математика уонна биология биридимиэтин талаллар эбит.

Салгыы СӨ Үөрэҕин уонна билимин министиэристибэтин үөрэх хаачыстыбатын кэтээн көрөр киинин дириэктэрин солбуйааччы Таисия Иванова “Түмүк аттестацияны ыытыы уратылара» диэн тиэмэҕэ дакылаатын иһитиннэрдэ. Сыыппара-иһитиннэрии сайдыбыт үйэтигэр олорорбутунан, хас биирдии оскуола үлэтин сырдатар анал саайтаах буолара ирдэнэр. Ол саайты толоруу итэҕэстэрин-быһаҕастарын ырытта.

Киин сүрүннүүр исписэлииһэ Михаил Архипов “Үөрэх тэрилтэлэригэр информационнай куттал суох буолуута” тиэмэҕэ иһитиннэрии оҥордо.

Күн иккис аҥарыгар анал бөлөхтөрүнэн үлэлэр ыытылыннылар. Быйыл үөрэх дьылын түмүктүүр оҕолор төрөппүттэрин кытта көрсүһүү буолла.

Быйылгы эксээмэннэр этэҥҥэ ааһалларыгар, тулууру, ситиһиини баҕарабыт.

 

Елизавета Неустроева.