Сочи куоракка Арассыыйа Бэрэсидьиэнэ Владимир Путин ыйааҕынан кулун тутар 1-7 күннэригэр Аан дойдутааҕы ыччат бэстибээлэ ыытылла турар. Манна 189 дойдуттан араас омук ыччата, ол иһигэр Арассыыйа субъектарыттан 84 дэлэгээссийэ кэлэн кытта сылдьаллар. Саха сирин дэлэгээссийэтигэр Атласовтар дьиэ кэргэн, ырыаһыттар, үҥкүүһүттэр – уопсайа 100 киһи тиийбититтэн кыттааччыта 63 ыччат.
Мэҥэ Хаҥалас улууһуттан Нөөрүктээйи нэһилиэгиттэн ХИФУ хотугулуу-илиҥҥи омуктар тылларын уонна култуураларын үөрэтэр институт ыччаты кытта үлэни тэрийэр салаатын 1-кы кууруһун устудьуона Алина Китаева, Аллараа Бэстээхтэн Дьокуускай куоракка “Инсайт-люди” диэн продюсерскай киин устуудьуйатын салайааччыта Айыына Федорова уонна улуус социальнай бэлиитикэҕэ управлениетын салайааччы Октябрина Кулешова кыттыыны ыла сылдьаллар.
Октябрина Никитична бу туһунан “Эркээйи” хаһыакка анаан төлөпүөнүнэн кылгастык маннык билиһиннэрдэ:
— Бэстибээл наһаа баай ис хоһоонноох, киэҥ бырагыраамалаах. Сарсыарда 6 чааска туран сэрээккэттэн саҕалааммыт, киэһэ хойукка диэри сылдьан быыстапкалар, маастар-кылаастар уонна кэнсиэрдэр буолаллар. Биһиги мантан бэйэбитигэр элбэҕи көрө-билэ сатыыбыт. Тус бэйэм үөрэхтээһин бырагыраамаларыгар сылдьа сатыыбын, ыччат бэлиитикэтин тенденциятын туһунан лиэксийэҕэ сырыттым, «Движение первых” гранын туһунан кэпсээтилэр. “Общество. Знание” диэн эмиэ видео-контены хайдах оҥоруохха сөбүй диэн кэпсэтиигэ сырыттым. “ВКонтакте” социальнай ситим дьиэтигэр күн аайы лиэксийэ бөҕө буолар, онно сылдьан хайдах олороллорун, үлэлииллэрин баран көрдүбүт, ол иһигэр бэйэлэрин кыахтарын хайдах туһаналларын кэпсээтилэр, хайдах онно холбоһук тэрийэн, дьон киирэн көрөрүн хааччыйалларын сырдаттылар. Манна кэлэн баран элбэҕи ылаары, элбэххэ үөрэнээри идиэйэлэри көрө сатыыбыт, бэйэбитигэр кэлэн баран тугу сайыннарыахха, тугу киллэриэххэ сөбүй, ыччаппытыгар тугу тиэрдиэххэ сөбүй диэн сыаллаах-соруктаах сылдьабыт. Ону таһынан, исписэлиистэр Сахабыт Өрөспүүбүлүкэтин быыстапкатыгар уочараттаан турабыт. Манна араас омук ыччаттарын, Арассыыйабыт субъектарыттан кэлбит ыччаттары көрсөбүт, хабылык, хаамыска оонньууларыгар маастар-кылаастары ыытабыт, бэйэбит Сахабыт сирин култууратын сырдатабыт уонна саамай астыммыппыт диэн бэстибээл аһыллыытыгар кыттыыны ылбыппыт буолар. Наһаа киэҥ уонна дириҥ ис хоһоонноох диэххэ сөп. Бэстибээл ис хоһооно барыта бэйэҕиттэн тутулуктаах диэн. Дьиэ кэргэҥҥэ элбэх болҕомто уурбуттар, «Человеку нужен человек”, “Россия – страна возможностей”, “Все начинается с тебя” диэн тыллар наһаа элбэхтэ иһиллэллэр. Барыта киһи ис туругун, санаатын көтөҕөр гына тэрийбиттэр. Таҥастан, бырагыраамалартан саҕалаан барыта толкуйданан, хас биирдии кыттааччы этиитэ олус кэрэхсэбиллээх. Ыччакка, дьиэ кэргэҥҥэ, ыччакка айти өттүгэр, ыччат хайдах сайдыахтааҕар наһаа элбэх болҕомто ууруллар. Бэйэбит ВК мессенджербитигэр, телеграм ханаалга киһи хайдах бэйэтин сайыннарыан сөбүй, лиидэр быһыытынан бэйэҕин хайдах арыйыаххын сөбүй, о.д.а. олус элбэх саҥаны биллибит. Элбэх ыччаттары кытта күн аайы билсэбит, омуктары кытта хаалсыбакка тэҥҥэ кэпсэтэ сылдьабыт. Биһиэхэ шефтэһэн үлэлиирбитигэр Соҕурууҥҥу Африка дойдутун сыһыарбыттара. Бэҕэһээ Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Ольга Балабкинаны кытта Африкаттан кэлбит ыччаттарбытыныын аал-луук маска көрсүһүү тэрийбиппит, оһуокайдаан, култуурабытын кэпсээн бэйэ-бэйэбитиниин билсибиппит.
Биир дойдулаахтарбыт Сахаларын сирин култууратын Аан дойду ыччаттарыгар билиһиннэрэ, бэйэлэрэ инники үлэлэригэр элбэх саҥаны билэн кэлэн үлэлэригэр, олохторугар туһанарга кыһаллан, араас элбэх омуктары кытта тэҥҥэ хардыылыы сылдьалларынан киэн туттабыт.
Марелла Баишева.
