Бүгүн, ахсынньы 13 күнүгэр, Хорообукка Чалҕаа нэһилиэгиттэн төрүттээх, тыыл, үлэ бэтэрээнэ, Сойуус саҕанааҕы тыа хаһаайыстыбатын үтүөлээх үлэһитэ, Алдан оройуонун, Хатыыстыыр нэһилиэгин Бочуоттаах олохтооҕо, «Учууталлар учууталлара» бэлиэ хаһаайына Владимир Петрович Ильин ‒ Айаарыскай төрөөбүтэ 90 сылыгар «Ахтан-санаан ааһыаҕыҥ» ахтыы биэчэрэ буолла.
Биэчэри Хорообут нэһилиэгин баһылыгын эҕэрдэтинэн аһылынна, «Таа Баалын уолабын» хоһоонунан Наталья Борисова‒Атаскаан кыыһа эҕэрдэлээтэ. Нэһилиэк краеведа, эдьиийдэрэ Светлана Ильина төрөппүттэрин билиһиннэрдэ. Хорообут орто оскуолатын иитэр үлэҕэ завуһа Октябрина Васильева аҕатын, Күүстээх Миитээскилиин алтыһан ааспытын туһунан кэпсээтэ. Ильиннэр бииргэ төрөөбүт бырааттарын, аҕаларын туһунан Марфа Шишигина аҕынна. Бэйэлэрэ оҥорон таһаартарбыт саҥа кинигэлэрин аймахтарыгар бэлэх ууннулар. Салгыы аймах-билэ дьонун, үөрэммит сылларын Ирина Ильина, Анна Скрябина, Татьяна Тролукова кэпсээтилэр.
Айаарыскай хоһоонноруттан 8, 11 кылаас үөрэнээччилэрэ, «Үөрүү Сүүрээнэ» түмсүү чилиэннэрэ аахтылар. Агафий Иванов, убайдара, бырааттара Николай Ильин ахтан-санаан аастылар.
Владимир Петрович мин аҕабын Афанасий Кирсанович Филипповы кытта кыра эрдэҕиттэн бииргэ улаатан, кэлин куруук сылдьара, билсэ тураллара. Ол туһунан мин ‒ Варвара Филиппова ахтан кэпсээтим.
Владимир Айаарыскай бэйэтэ суруйан хаалларбыт хоһооннорун хомуурунньуга аҕыйаҕа суохтар. Эҕэрдэ нүөмэри «Сандаара» ырыа ансаамбыла бэлэхтээтилэр. Биэчэрбит сүрүн ыалдьыттарынан Айаарыскай-Владимир Петрович кыргыттара Наталья, Мария Владимировналар, кинилэр оҕолоро, сиэннэрэ буоллулар. Тэрээһини тэрийэн ыыппыт дьоҥҥо-сэргэҕэ махтаннылар, бары үчүгэйи баҕардылар. Аҕаларын Владимир Петрович мэтириэтин, «Харба Атах» хоһоонун бэчээттэтэн аҕалбыттарын олохтоох бибилэтиэкэҕэ өйдөбүнньүк быһыытынан бэлэхтээтилэр.
Түмүктээн эттэххэ, бары кыттыбыт, кыттыспыт, араас өттүнэн күүс-көмө буолбут дьоммор, чуолаан Светлана Ильинаҕа, Антонина Тихоноваҕа уо.д.а. махтанабын. Быйылгы сылга суруйар дьоҕурдаах дьоммут үбүлүөйдээх саастарын төһө кыах баарынан бэлиэтээтибит.
Варвара ФИЛИППОВА.
