«Оҕо саас, дьиэ кэргэн уйгулаах олоҕун уруйдаан туойабыт!» аҕам саастаах дьон улуустааҕы бэстибээллэрин иккис күнэ Хара нэһилиэгин «Айыллаан» култуура киинигэр алта ыаллыы нэһилиэк бэтэрээннэрин түмтэ.
Кэлбит ыалдьыттары Хара нэһилиэгин баһылыга Дария Назарова эҕэрдэлээтэ.
Бэстибээл кыттыылаахтарын Виталий Очиров ырыанан арыйан дьон сүргэтин көтөхтө.
Нэһилиэктэр кэнсиэр иннинэ талааннаах дьоннорун таптыыр дьарыктарын сэһэргиир 10 мүнүүтэлээх видео роликтары көрдөрөн көрөөччү болҕомтотун тартылар.
Харалар кэнсиэрдэрэ дохсун ытыс тыаһынан доҕуһуолланна.
Дьүүллүүр сүбэ эр дьон вокальнай ансаамбыла Дмитрий Санников «Күүлэй» ырыатын олус чуолкайдык иһиллэр үс куолаһынан толоруутун хайҕаата, утумнаахтык дьарыктаналлара биллэрин бэлиэтээтэ.
Бу бэстибээл саҕаланыаҕыттан кыттар фольклор бөлөҕө «Сайаана» диэн биллэр-көстөр кэлэктиип буола сайдыбыта, өрөспүүбүлүкэ Арассыыйа тас өттүгэр ситиһиилэнэрэ, таһымнаммыта астыннарар.
Николай Васильев туруоруутугар «КУСЧУТТАР» диэн үҥкүүлээх, пантомималаах, тыаһынан-ууһунан сэргэх киэргэтиилээх бэрт сонун сыаҥканы дьон астына көрдө, дуоһуйа күллэ. Култуура эстэпиэтэтин бэтэрээнэ Спиридон Григорьев Афанасий Илларионов тылларыгар, Петр Васильев матыыбыгар «Илбис курдук имнэнэн» ырыаны үрдүк таһымнаахтык толорон быйыл да лауреат үрдүк аатын ылла.
Тыыллымалар үс лауреат, икки дипломант буолар нүөмэрдээх бэртээхэй кэнсиэри аҕалбыттар.
«Чороонноох» үҥкүү, фольклорнай трио толоруутугар норуот ырыата, «Нуһараҥ» дьахталлар вокальнай ансаамбыллара үс куолаһынан уратытык толорбут «Мин ийэм» ырыата, трио толоруутугар «Дэйбиир ырыата» лауреат үрдүк аатын ылыахтарын ыллылар. Бу ырыалары бэлэмнээбит Валентина Никифорова бэйэтэ «Алааһым арылы кустуга» ырыатынан дипломант буолла. Мария Прокопьева бэйэтэ суруйбут «Сарсыардааҥҥы эҕэрдэлэр» хоһуйууларын ааҕан грамотанан бэлиэтэннэ.
Догдоҥо нэһилиэгин уус-уран бөлөҕүн икки үҥкүүтэ дьон биһирэбилин ылан, «Эҕэрдэ үҥкүүтэ» дипломант, «Дьол вальса» лауреат буоллулар.
Олохтоох ааптар Светлана Иванова-Намыына «Оскуола – тирэхпит буолаҕын» суруйуутунан уус -уран ааҕыы бөлөҕө, Анатолий Иванов гитаралаах «Дьоро киэһэ» солота лауреат буоллулар. «Сибэккилэр» дьахталлар вокальнай ансаамбыллара дипломант аатын ылла.
Улууспут култуураҕа, духуобунаска киинэ Майа бэстибээлгэ биэс уус-уран кэлэктиибинэн элбэх киһини кытыннаран астыктык кытынна.
«Айыллыат» бөлөх «Эр Соҕотох бухатыыр» олоҥхоттон быһа тардыынан, «Умсулҕаннар» «Сэттэ мэтириэтинэн», Антонина Петрова «Мин ийэм» уус-уран ааҕыынан дипломант буоллулар.
Любовь Антонова Аркадий Алексеев «Доҕоруом, дабай күөх сыырдаргын» солонан, үҥкүүһүттэр бөлөхтөрө «Кадрилынан» лауреат үрдүк аатын сүктүлэр.
Ходоролор кэнсиэрдэрин «Мичээр «вокальнай ансаамбыл В.Ноев «Чараҥҥа» ырыатынан аһан лауреат буолла. Көрөөччүлэр Николай Атласов «Алгыспын аныам» ырыатын дохсун ытыс таһыныынан көрүстүлэр. Кэнсиэри бэрт сэргэхтик салайан ыыппыт Мария Кылабысова бэйэтин хоһуйуутун уус -уран ааҕыытынан эмиэ лауреат аатын сүктэ.
Бөлөх толоруутугар «Узбектыы үҥкүү», «Ойох кэпсэтии» сыаҥка диплом ыллылар. Ходоролор түмүктэригэр биллэр биир дойдулаахтарын, олоҥхоһут Григорий Слободчиков-Тэлээркэ «Дьулуруйар Ньургун Боотур» олоҥхотуттан быһа тардыыны бөлөҕүнэн толорон, көрөөччүгэ бастакы тахсыылара ситиһиилэнэн, дипломант буолан үөрдүлэр.
Бэстибээл иккис күнүн харыйа мастаах, байанайдаах Хаатылымалар түмүктээтилэр. Наталья Устинова хомуска дьүрүһүтэ оонньоон лауреат аатын ылла, японскай үҥкүү дипломунан бэлиэтэннэ.
Бу күн алта нэһилиэктэн аҕам саастаах дьон өрө көтөҕүллэн ыллаатылар-туойдулар, «Айыллаан» кулууп алыптаах тыыныгар уйдаран күүстэригэр күүс -сэниэ эбиннилэр.
Евдокия Решетникова,
улуус бэтэрээннэрин сүбэтин бэрэссэдээтэлэ.
