Догдоҥо нэһилиэгиттэн төрүттээх Майа олохтооҕо, «Сахатранснефтегаз» Бөкөтөөҕү учаастагын оператора Роман Морозовтан байыаннай дьайыыга кытта сылдьар биир дойдулааҕа дронтан саһар трансформер плащ-спальник тигэн ыытарга көмө көрдөспүт. Саллааттарга плащтар бааллар эрээри курдат көрдөрөр буолан дронтан кыайан көмүскээбэт эбиттэр, онон “биһиэхэ көрдөрбөт, кистиир наада” диэбит саллаат. Роман Морозов доҕорун көрдөрһүүтүн тута ылынан бу дьыалаҕа хамсааһыны тэрийэн дьиэ кэргэнэ, аймахтара кыттыспыттар. Элбэх оҕолоох ийэ Юлия Иванованы уонна кини дьүөгэтин Ньургуйаана Иванованы иистэнньэҥ быһыытынан көмөлөһөллөрүгэр көрдөспүттэр. Юлия дьүөгэтиниин улуустарга байыаннай дьайыыга иистэнэр сыахтартан оннук матырыйаалы ыйыталаһан көрбүттэрэ, ким да тутта илик эбит.
Роман Морозов массыынатынан догдоҥолор дронтан саһыарар үчүгэй матырыйаалы куоратынан, тыанан нэдиэлэни быһа көрдөөбүттэр. Байыаннай таҥаһы тигэр матырыйаалга наадыйааччы билиҥҥи кэмҥэ элбэх буолан сыаната да ыарахан. “Ким көрдүүр, ол булар” диэбиккэ дылы, кинилэр элбэх маҕаһыыны кэрийэн наадыйар табаардарын булбуттар. Матырыйаалы бэйэлэрэ тигэн, тепловизорунан бэрэбиэркэлээн, көрдөрбөт, булларбат, саамай табыгастаах барыйаан диэн санааҕа кэлэн, 50 саллаат таҥнарыгар суоттаан Дьокуускайтан ылан аҕалбыттар. Аны бэйэлэрин күүстэринэн нэдиэлэ устата тигэн бүтэриэ суохтарын өйдөөн Майалартан көмө көрдөөбүттэр. Майа дьаһалтата “Түмэн” уопсастыбаннай холбоһук салайааччытын Мария Лукинаны кытта сүбэлэһэн бараннар тута тэрилтэлэри кытта кэпсэтэн, кинилэр өйөбүллэринэн үлэ саҕаланна.
Балаҕан ыйын 6 күнүгэр Майа сэлиэнньэтин дьаһалтатыгар баһылыгы социальнай боппуруоска солбуйааччы Дмитрий Игнатьев иистэнньэҥнэри ыҥыран сүбэ-мунньах тэрийдэ. “Түмэн” уопсастыбаннай холбоһук ииһин сыаҕын кырыйааччыта Антонина Петрова Майатааҕы Бизнес-инкубатор идэлээх иистэнньэҥэ, кырыйааччыта Татьяна Аргуноваттан нэмиэттээх кэлэн, Бөкөлөр аҕалбыт матырыйаалларын быһан бэлэмнээтилэр.
Матырыйаалы Майатааҕы В.П.Ларионов итиэннэ Ф.Г.Охлопков аатынан орто оскуолалартан, Д.Ф.Ходулов аатынан култуура кииниттэн, “Түмэн” уопсастыбаннай холбоһуктан бэрэстэбиитэллэр үллэһиннилэр. Кинилэргэ улуустааҕы социальнай бэлиитикэ үлэһиттэрэ кыттыһыахтара. Миэтэрэнэн элбэх таҥаһы кырыйан дьаарыстыырга олохтоох дьаһалта күүстээх аҥардара көмөлөстүлэр. Матырыйаал үбүн саллаат бэйэтэ уонна кини аармыйаҕа бииргэ сулууспалаабыт доҕотторо, чугас табаарыстара уйуммуттар.
Баһылыгы солбуйааччы Дмитрий Александрович: “Бөкөлөр матырыйаалы элбэҕи боруобалаан бу сөптөөх, курдары көрдөрбөт үрдүк технологиялаах матырыйаалы буллулар. Бу плащ дойду көмүскэлигэр сулууспалыы сылдьар саллааттарга ханна сылдьалларын көрдөрбөт, хаххаланар суолталаах тыын боппуруос буолар. Бырайыакпыт табылыннаҕына улуус баһылыгар тиэрдэммит, улуус таһымыгар тахсан, уопсастыбаннас, субуотунньук күүһүнэн үлэ иэнэ кэҥиэ этэ”, — диэн санаатын үллэһиннэ.
Саҥа саҕаламмыт бырайыак биир дойдулаахтарбыт сырдык тыыннарын өллөйдөөн, кыайыы көтөллөөх алаһа дьиэлэригэр этэҥҥэ эргиллэн кэлэллэригэр төһүү күүс буоллун.
Марелла Баишева.
