1994 с. Бэдьимэ оскуолатыгар “Норуот муудараһын дьиэтэ” диэн бэртээхэй мусуой аһыллыбыта. Сергучева Тамара Алексеевна санаатын ууран туран 8лэлэппитэ. Араас уруоктар, тэрээһиннэр, сэкминээрдэр мусуой базатыгар ыытыллаллара. Кэлин 2013 сылга мусуой оскуола иһигэр көһөрүллэн, баһаарга хаарыан мунньуллубут матырыйааллар,экспонаттар уокка былдьаммыттара.
2017 с. оскуола базатыгар, оччолорго оскуола дириэктэрэ Андросов Петр Васильевич оскуола үлэһиттэрин көҕүлээн, балаҕан көҥдөйүн туппуттара. К2мүлүөк оһоҕун нэһилиэк оһохчутугар Эверстов Иван Никоновичка оҥорторбуттара. Ол кэннэ кыралаан эбии үлэлэр ыытыллан, силигин ситэн, балаҕан ыйын 27 күнүгэр ‒ СӨ Судаарыстыбаннаһын күнүгэр сөп түбэһиннэрэн, оскуола кэлэктиибин күүһүнэн үөрүүлээх аһыллыыта буолла. Төрөппүт кэмитиэтин чилиэннэрэ Андреева Саргылаана, Соловьева Надежда ыалдьыттары арыылаах алаадьынан айах туттулар, “Дьүөгэ” түмсүү (сал. Кривошапкина М.К.) ыраастааһын сиэрин-туомун оҥордо. Олохтоох дьаһалта баһылыга Петр Андросов эҕэрдэ тыл эттэ. Балаҕан-түмэл тутуллуутун туһунан ахтыыны Егор Захаров оҥордо уонна олохтоох тырахтарыыс уолаттарга Андреев Степаҥҥа, Варламов Михаилга,Филиппов Валерийга, мас кэрдээччи Айсен Неустроевка, пилораматынан көмөлөспүт Игорь Плотниковка махтал тылларын тиэртэ. Улуус үөрэҕириитин начаалынньыга Толстяков Гаврил эҕэрдэ тыл эттэ. Оскуола дириэктэрэ Владислав Иванов балаҕан тутуутугар үлэлэспит дьоҥҥо наҕараадалары туттарда. Балаҕан аһыллар лиэнтэтин олохтоох дьаһалта баһылыга Петр Андросов, улуус үөрэхтээһинин начаалынньыга Гаврил Толстяков, бэтэрээн учуутал Сергучева Тамара үөрүүлээх быһыыга-майгыга быстылар. Ол кэннэ Сергучева Тамара көмүлүөгү аһатта, алгыс тылын тириэртэ. Тэрээһини “Күпсүүр” ансаамбыл 9 кылаас оҕолоро (сал. Захарова К.К.), Елена Чемезова “Сахам сирэ” ырыатынан киэргэттилэр. Атын да ыалдьыттар, выпускниктар туора турбакка, эҕэрдэ тылларын, бэлэхтэрин туттардылар. 55 сыл анараа өртүгэр оскуоланы бүтэрбит выпускниктар ааттарыттан Попов Михаил бу түмэл аһыллыытыгар 55 тыһыынча харчынан көмөнү оҥорбуттар, 45 сыл анараа өттүгэр бүтэрбит выпускниктар ааттарыттан 6 туорайдаах олоппоһу Аргунов Иван туттарда, 30 сыллаах выпустар 30 тыһыынча уу харчыны утары ууннулар, 15 сыллаах выпустар ааттарыттан Мордискина Февронья сэмэй бэлэҕин туттарда. “Дьүөгэ” түмсүү дьоҕус олоппостору бэлэхтээтэ. Иис маастардара Сергучева Мария, Винокурова Саргылана бэйэлэрин илиилэрин сылааһынан оҥорбут дэйбиирдэрин, саламаларын, туос иһиттэрин бэлэх ууннулар.
Ыалдьыттар түмэл иһин киирэн астына көрдүлэр, иһиттилэр, салгыы үлэлииригэр алгыс тылларын тиэртилэр. Луиза Харитонова, Александра Попова, Надежда Дмитриева түмэли бэлэмнээн, сиһилии көрдөрдүлэр. Оскуола боропсойууһун тэрээһининэн (сал. Емельянова А.П.) сандалы тардылынна. Түмэл салгыы үлэлииригэр сүбэлэһии буолла. Түмэл арыллыытын уопсай тэрээһинин оскуола иитэр үлэтин салайааччыта Попова Екатерина үрдүк таһымҥа ыытта.
Марина Яковлева,1Баатара.
