«Хаарбах дьиэттэн көһөрүү» бырагыраама
Сэтинньи 19 күнүгэр улууспут административнай киинигэр ‒ Аллараа Бэстээх бөһүөлэгэр биир бэлиэ күн үүннэ. «Хаарбах дьиэттэн көһөрүү» бырагырааматынан бөһүөлэк киинигэр турар Кооперативнай уулуусса 6 №-дээх дьиэтин бастакы куорпуһугар саҥа таас олорор дьиэ үлэҕэ киллэриллэр бэлиэ тэрээһинэ буолан ааста.
Биэс этээстээх 41 кыбартыыралаах дьиэни Эдгар Чгрикян генеральнай дириэктэрдээх «Дайкири» ХЭТ туппут. Биир, икки, үс, түөрт хостордоох кыбартыыраларга Магистральнай, Строительнай кыбаарталларыгар, Нефтебаза, ЛЭП оройуоннарыгар, Ойуунускай, Алданскай уулуссаларга турбут хаарбах дьиэлэртэн олохтоохторо көстүлэр.
Саха омук сиэринэн Айыыларга, иччилэргэ сүгүрүйэн, махтанан аал уоту оттон саҥа дьиэҕэ киирэр дьоҥҥо үтүө баҕа санаатын ааттаах-суоллаах алгысчыт Петр Тихонов тиэртэ. Улууспут баһылыга Дмитрий Тихонов саҥа дьиэҕэ кыбартыыралар күлүүстэрин тутар дьоҥҥо-сэргэҕэ туһаайан эппит эҕэрдэ тылыгар дойдубут Бэрэсидьиэнэ Владимир Путин, өрөспүүбүлүкэбит Ил Дархана Айсен Николаев нэһилиэнньэ олоҕун хаачыстыбатын тупсарыыга ыытар бэлиитикэлэрэ олоххо киллэриллэн үгүс өрүттээх үлэ-хамнас ыытылларын маннык үөрүүлээх түгэннэр туоһулуулларын бэлиэтээтэ.
«Аллараа Бэстээх» куорат түөлбэтин баһылыга Юрий Колмаков аҕыйах ыйынан «Култуура» национальнай бырайыагынан саҥа Култуура киинэ уонна эмиэ сотору кэминэн таас балыыһа тутуллан үлэҕэ киллэриллэн дьон олоҕун уйгута салгыы тупсарыгар дойдубут, өрөспүүбүлүкэбит салалталара, бырабыыталыстыбалара болҕомто ууралларыгар, өйөбүл буолалларыгар махтанна. Юрий Николаевич бэлиэтээбитинэн, Аллараа Бэстээххэ эһиилги сылга 117 кыбартыыралаах олорор дьиэни тутан үлэҕэ киллэрдэхтэринэ, бөһүөлэккэ хаарбах дьиэттэн көһөрүү үлэтэ толору түмүктэниэхтээх.
Урут, билигин да Аллараа Бэстээх элбэх омук олорор нэһилиэнньэлээх пуунунан биллэр. Өрөспүүбүлүкэбитигэр тыа сиригэр маннык элбэх омук олохсуйбут сирэ, бука, суоҕа буолуо. Чечняттан 1990 сыллаахха Саха сиригэр көһөн бастаан Дьаҥхаадыга, кэлин Аллараа Бэстээххэ олохсуйбут тутааччы идэлээх «Туймаада-нефть» тэрилтэ үлэһитэ Саламу Абубакаров ‒ саҥа дьиэҕэ көһөн киирбит дьонтон биирдэстэрэ.
‒ Үөрүүм муҥура суох, ‒ диир Саламу Ахметович. ‒ Хаарбах, саахалланар туруктаах дьиэлэргэ олорор усулуобуйабыт быстар мөлтөҕө. Ордук маҥнайгы этээскэ олорор дьон кыһынын эрэйи тоҥон-хатан үгүс эрэйи көрсөрө. Тутааччы буоларбынан тус бэйэм дьиэбит, саҥа кыбартыырам хаачыстыбалаахтык оҥоһуллубутунан олус астынным. Барыта орун-оннугар. Бэртээхэй бырагырааманы олохтообут дойдубут Бэрэсидьиэнигэр, ону олоххо киллэрсиигэ үлэни ыытар өрөспүүбүлүкэбит Ил Дарханыгар, улууспут, бөһүөлэкпит баһылыктарыгар уонна тутааччыларга истиҥник махтанабын.
Олохтоох балыыһаҕа медсиэстэрэнэн үлэлиир Тамара Скрябина кэргэнин Василий Васильевиһи, оҕолорун кытта кыбартыыларын аанын аһан киирээт, хос эркиннэрин кэрийэ сылдьан өбүгэлэрбит үгэстэринэн арыылаах алаадьынан күндүлээтилэр.
‒ Бүгүн биһиги дьиэ кэргэҥҥэ өр күүппүт, кэтэспит үөрүүлээх күммүт тосхойдо. Сабыс-саҥа дьиэҕэ көмүс ньээкэ уйаланныбыт. Үс оҕолоохпут. Бастакы этээскэ икки хостоох кыбартыыра күлүүһүн туттубут. Хас хос ахсын аныгылыы оҥоһуулаах муостабыт сылаас буоларын көрөн олус үөрдүбүт, бу дьиэни туппут, көһүүгэ кыттыспыт бары дьоҥҥо махталбыт муҥура суох, ‒ диир дьиэ хаһаайката Тамара Давлятовна.
Кыыс Амматтан Александра, Павел Колесовтар Аллараа Бэстээххэ кыыстарыгар сиэннэрин көрсө көһөн кэлбиттэрэ уонча сыл буолбут.
‒ Магистральнай кыбаарталга икки этээстээх хаарбах туруктаах дьиэҕэ олорбуппут. Саҥа дьиэҕэ сылаас, сырдык кыбартыырабытын көрөн олус астынныбыт. Сааһырбыт дьон тупсаҕай оҥоһуулаах, толору хааччыллыылаах дьиэҕэ олорорбутуттан ордук туох кэлиэй? Аллараа Бэстээҕинэн кэлэр-барар аймах-билэ дьоммутун биһиэхэ ыалдьыттаан ааһалларыгар ыҥырабыт, ‒ диир Александра Большевична.
Ити курдук, саҥа дьиэҕэ киирбит дьон үрдүк үөрүүлэрин тэҥҥэ үллэстэн кинилэргэ бастакы ыалдьыт буолан бэйэбит да сүргэбит көтөҕүлүннэ. Саҥа дьиэ бөҕө эркиннээх, сылаас холумтаннаах буоллун, дьол-соргу уйаланнын!
Алена ДОКТОРОВА.
