Арассыыйаҕа Дьиэ кэргэн, Саха Өрөспүүбүлүкэтигэр Оҕо саас, Майаҕа Чөл олох сылларын чэрчитинэн ахсынньы 20 күнүгэр Д.Ф.Ходулов аатынан култуура киинигэр Майа сэлиэнньэтигэр бары эйгэҕэ сыл бастыҥнарын быһаарар “Бастыҥ” бириэмийэни туттарыы үөрүүлээх тэрээһинэ үрдүк таһымнаахтык ыытылынна.
Дьоро киэһэ минньигэс астаах фуршетынан саҕаланна. Манна Майатааҕы М.К.Попова аатынан оҕо ускуустубатын оскуолатын учууталлара Зоя Чупрова, Даниил Алексеев классика муусуканан киэргэттилэр, фотозонаҕа ыҥырыылаах ыалдьыттар хаартыскаҕа түстүлэр.
Өрөгөйдөөх тэрээһини култуура исписэлиистэрэ, бастыҥ уонна көхтөөх дьиэ кэргэн Мария, Станислав Ивановтар иилээн-саҕалаан ыыттылар.
“Бастыҥ” бириэмийэ кыайыылаахтарынан буоллулар: анал байыаннай дьайыы кыттыылаахтарыгар элбэх хайысханан көмөнү оҥорор, Сэрии сылларын оҕолорун 2-с кинигэтин таһаараары сылдьар, улуустааҕы “Эркээйи” хаһыат волонтердарын түмсүүтүн тэрийбит, “Сүрэхтэн сүрэххэ” бырайыагы төрүттэспит “Түмэн” уопсастыбаннай түмсүү (сал. Мария Дмитриевна Лукина), оройуоннааҕы киин балыыһа психиатр-нарколог бырааһа, чөл олоҕу көҕүлээччи, “Майа Ран” сүүрүктэр түмсүүлэрин салайааччыта, “Человек идущий” Бүтүн Арассыыйатааҕы фоновай хаамыы күрэхтэһиитин кураатара, уопсастыбанньык Александра Егоровна Мохначевская, сэлиэнньэ, улуус граннарын көхтөөх кыттааччыта, “Түөлбэ бочуоттаах олохтооҕо” диэн 75 саастарыттан үөһээ саастаах ытык дьоҥҥо бэлиэни олохтообут “Ураһалаах” түөлбэ (сал. Акулина Николаевна Алексеева), Д.Ф.Ходулов аатынан норуодунай тыйаатыр режиссера, “Алыптаах мааска” өрөспүүбүлүкэтээҕи бэстибээл бастыҥ үлэлээх режиссера, “Ноо” бэстибээл “Режиссер кылаан чыпчаал ситиһиитэ” анал ааттар хаһаайына, СӨ норуотун хаһаайыстыбатын үтүөлээх үлэһитэ В.В.Скрябин төрөөбүтэ 80 сылыгар аналлаах “Бастакы” испэктээги туруорбут Данил Николаевич Осипов “Бастыҥ айар кут” анал ааттар кыайыылаахтарынан ааттаннылар.
Арассыыйатааҕы култуура үлэһиттэрин сойууһун сүүмэрдээһинин ааһан “Бастыҥ айымньылаах дьиэ кэргэн” ахсааныгар киирэн Москваҕа Арассыыйа Бочуоттаах грамотатын туппут, “Муус Устар” өрөспүүбүлүкэтээҕи ыччат бэстибээлин “Хомус тэтимэ” күрэхтэһиигэ 3-с миэстэ буолбут, “Табыс” ыччат бэстибээлин “Голос молодежи” күрэхтэһиитин кыайыылаахтара Мария Васильевна, Станислав Александрович Ивановтар “Сыл бастыҥ ыала”, педагогтар өрөспүүбүлүкэтээҕи дьаарбаҥкаларын тэрийээччилэрэ, кыттыылаахтара, Москва куоракка ыытыллыбыт агропромышленнай дьаарбаҥкаҕа 3 кыһыл, 1 үрүҥ көмүс мэтээли ылары ситиспит, о.д.а. элбэх ситиһиилэрдээх В.П.Ларионов аатынан орто оскуола “Бастыҥ көхтөөх тэрилтэ”, “Пластмастер” пластиковай, алюминиевай түннүктэри, ааннары оҥорор тэрилтэ хаһаайына, элбэх үлэ миэстэтин таһаарбыт, анал байыаннай дьайыыга, элбэх аахсыйаларга көхтөөхтүк кыттар Сергей Михайлович Холмогоров “Бастыҥ урбаанньыт”, Ф.Г. Охлопков аатынан орто оскуола учуутала, 10 “б” кылаас салайааччыта, анал байыаннай дьайыыга сылдьар байыастар дьиэ кэргэттэригэр тимуровскай үлэлэри тэрийэр, “Түмэн” уопсастыбаннай холбоһук ыытар үлэлэрин көхтөөх кыттааччыта, сыллата реабилитационнай киин оҕолоругар Саҥа дьыллааҕы бэлэхтэри оҥорон күндүлүүр Анна Петровна Васильева “Бастыҥ амарах санаа”, 1995 сылтан кэтэх хаһаайыстыба тэринэн күн бүгүн 20 сүөһүлээх, онтон 8 ыанар ынахтаах, ыччатын тыа хаһаайыстыбатын үлэтигэр көҕүлээччи, бэйэтин массыынатынан субуотунньуктарга көмөлөһөн көхтөөхтүк кыттар Семен Егорович Назаров “Бастыҥ кэтэх хаһаайыстыба”, В.П.Ларионов аатынан орто оскуола 9 кылааһын үөрэнээччитэ Максим Леонидович Семенов “Сыл бастыҥ спорстмена” (оҕолорго), Мэҥэ Хаҥалас улууһун футболга сүүмэрдэммит “Манчаары” хамаандатын хапытаана Игорь Сергеевич Дегтярев “Сыл бастыҥ спортсмена” (улахан дьоҥҥо), “Сахаада спорт” оҕунан ытыы успуордун маастара, СӨ оҕунан ытыыга успуордун маастарыгар хандьыдаат, Мэҥэ Хаҥалас улууһун оҕунан ытыы чөмпүйэнээтин 1-кы, 2-с миэстэлээх кыайыылааҕа Маргарита Николаевна Захарова “Сыл бастыҥ спортсмена” (бэтэрээннэргэ), дартс күрэхтэһиитин көҕүлээччи, тэрийээччи, СӨ чөмпүйэнээтигэр бэстилиэтинэн ытыыга 1-кы миэстэ, Сочи куоракка ыытыллыбыт Арассыыйатааҕы “Пара-арт” турнирга “Бочча” көрүҥҥэ хамаанданан 1-кы, дартска 4-с миэстэлээх Евгений Алексеевич Птицын “Сыл бастыҥ спортсмена” (адаптивнай успуорт), атах оонньууларыгар СӨ успуордун маастара, РФ успуордун маастарыгар хандьыдаат, оҕо-ыччат спортивнай оскуолатын тириэньэрэ, кини иитиллээччилэрэ өрөспүүбүлүкэ таһымнаах күрэхтэһиилэр кыайыылаахтара, призердара, ол иһиттэн “Чемпионы для России” Арассыыйатааҕы күрэхтэһии кыайыылааҕа, призера Максим Семенов, “Азия оҕолоро” аан дойдутааҕы 8-с оонньууларын ыстаныыга чөмпүйүөнэ Игорь Никифорович Скрябин “Сыл бастыҥ тириэньэрэ” анал ааттар кыайыылаахтарынан буоллулар.
2014 сылтан “Чолбон” салайар хампаанньа тэрилтэ сантехнигинэн эҥкилэ суох үлэтин итиэннэ бары ыытыллар үлэлэргэ көхтөөх кыттыытын иһин Кирилл Кириллович Егоров “Бастыҥ үлэ киһитэ”, “Түмэн” уопсастыбаннай холбоһук, “Айылгы арыллыыта”, “Эркээйи” волонтердара” түмсүүлэр чилиэннэрэ, барыга көхтөөхтүк уонна үрдүк эппиэтинэстээхтик кыттыытын иһин Полина Ивановна Осипова “Бастыҥ волонтер”, Ф.Г.Охлопков аатынан орто оскуолаҕа дириэктэри иитии үлэтигэр солбуйааччы уонна оҕо уопсастыбаннай түмсүүлэрин кытта алтыһыыга сүбэһитэ, Дойду үрдүнэн 2-с төгүлүн ыытыллыбыт “Новая философия воспитания” оҕо бириэмийэтин кыайыылааҕа, өрөспүүбүлүкэтээҕи “Бастыҥ сүбэһит” күрэхтэһии 2-с исттиэпэннээх дипломана, “Лучшая методическая разработка” куонкурус 3-с истиэпэннээх дипломана, “Лучший руководитель медиа школы Кэскил” бэлиэ хаһаайына, Майа дьахталларын сэбиэтин чилиэнэ Кэскилээнэ Николаевна Петрова “Бастыҥ ыччат”, атыы-эргиэн тэрилтэлэрин икки ардыларыгар ыытыллыбыт куйаар ситиминэн күрэхтэһиигэ 8053 куолаһы ылан “Вилена” маҕаһыын (сал. Иванов Семен Васильевич) “Бастыҥ атыы-эргиэн тэрилтэтэ” буоллулар.
Бастыҥнарга дипломнары, наҕараадалары анал ааттар ааспыт сыллааҕы бастыҥнара үөрүүлээх быһыыга-майгыга туттардылар.
2024 сыл бастыҥнарын “Майа сэлиэнньэтэ” тыа сирин түөлбэтин баһылыга Алексей Неустроев эҕэрдэлээтэ:
-Биһиги бука бары түмсүүлээхтик биир санаанан салайтарар буоламмыт Майабыт күн-түүн үүнэр-сайдар, тупсар. Бу сылга биһиги киин уулуссабытыгар саҥа аспаал уурдубут, Промкомбинакка анаан искибиэрдэннибит, “Таптал көлүччэтигэр” дьон-сэргэ сибиэһэй салгыҥҥа сынньанарыгар анаан “Зона акватории” оҥоһулунна, Кыайыы 80 сылын көрсө монумеммыт үлэтэ түмүктэниэҕэ. Бу иккис төгүлүн сыл бастыҥнарын бэлиэтиир үөрүүлээх тэрээһиммит хас биирдии кыттыылааҕа бары кыайыылаах буолаҕыт. Үүнэр 2025 сылы Майа сэлиэнньэтигэр аймаҕынан силиспитин быспакка бииргэ үлэлээн, бэйэ-бэйэҕэ көмөлөһөр үтүө үгэспитин бөҕөргөтөр сыаллаах Төрүччү сылынан биллэрдибит.
Баһылык Бочуоттаах грамотатынан уонна илии чаһытынан сэлиэнньэ иһигэр умайа турар элбэх кыбартыыралаах дьиэттэн дьону быыһаабыт Роберт Александрович Ноев, Николай Витальевич Жирков, 50000 солкуобай харчылаах Туоһу суругунан урууларын аһыы утаҕа суох оҥорбут эдэр ыаллар Нарыйа, Уххан Андреевтар, Айаана, Афанасий Одуннар, Даяна, Максим Никитиннар наҕараадаланнылар. Ытык ыаллар Светлана Михайловна, Николай Николаевич Охлопковтар бииргэ олорбуттара 55, Надежда Егоровна, Николай Никитич Никитиннар, Лилия Георгиевна, Дмитрий Иннокентьевич Шахурдиннар, Татьяна Петровна, Прокопий Прокопьевич Билюкиннар 50 сылларынан Майа сэлиэнньэтин “Бигэ ыал” үрүҥ көмүс бэлиэтинэн, Ил Дархан илии баттааһыннаах “Семейная Доблесть” статуэтканан наҕараадаланнылар. Анал аакка хандьыдааттар статуэтка туттулар.
Майабыт бастыҥ үлэһит дьонун чиэстиир өрөгөй киэһэҕэ тапталлаах ырыаһыттарбыт Айгылаан, Инна Донская-Дайаана, Вероника Степанова, Линда Захарова, Терентий Егоров, Семен Цой, Полина Аргунова ырыаларын-тойуктарын бэлэхтээн сыл бастыҥнарын үөрүүлэрин үрдэттилэр.
Марелла Баишева.
