Ааспыт сыл күһүнүгэр Мэҥэ Хаҥалас улууһугар национальнай многоборье көрүҥнэригэр федерация тэриллибитэ.
Федерация тэриллиэҕиттэн бу сыл күһүнүгэр диэри “Бизнес инкубатор” дириэктэринэн үлэлээбит Сергей Сергучев салайбыта. Билигин улуустааҕы “Бизнес инкубатор” дириэктэрэ Вячеслав Санников салайар. Толорооччу дириэктэринэн улуустааҕы Биир кэлим диспетчерскэй сулууспа салйааччыта Афанасий Максимов ананан үлэлиир.
Федерация чилиэннэринэн Баатара нэһилиэгин баһылыга Дмитрий Акимов, 1-кы Баатара нэһилиэгин баһылыга Петр Андросов, Дьаҥхаады нэһилиэгин баһылыга Василий Стручков, Моорук нэһилиэгин баһылыга Айисен Игнатьев, 2-с Наахара нэһилиэгин баһылыга Петр Никитин, Нөөрүктээйи нэһилиэгин баһылыга Николай Федоров, Хаптаҕай нэһилиэгин баһылыга Иван Зыков, Ходоро нэһилиэгин баһылыга Виктор Федоров, Хорообут нэһилиэгин баһылыга Гаврил Бродников, “Парус” успуорт киинин дириэктэрэ Дьулустаан Захаров, улуус саха многоборьетыгар ыстаарсай тириэньэрэ Темир Сыдыкбеков уо.д.а. буолаллар. Кэлэр сылга “Манчаары” ыспартакыйаадатыгар бу көрүҥ баар. Манна хамаандаҕа 70 кг диэри уонна онтон үөһээ ыйааһыннаах икки эр киһи, биир дьахтар уонна уоллаах кыыс, сүүмэрдээһини ааспыт спортсменнар киирэллэр. Улуустар бары дьоннорун сүүмэрдээһин үлэтин ыыта сылдьаллар.
Сэтинньи 27 күнүгэр “Өрөгөй” успуорт киинин уораҕайыгар национальнай многоборье көрүҥнэригэр Саха Өрөспүүбүлүкэтин федерациятын куубагын иһин бастакытын ыытыллар хамаанданан күрэхтэһии үрдүк таһымнаахтык ыытылынна. Манна Кэбээйи, Амма, Таатта, Чурапчы, Бүлүү, Нам, Уус Алдан уонна Мэҥэ Хаҥалас улуустарын күүстээх хамаандалара күрэхтэстилэр.
Саха Өрөспүүбүлүкэтин национальнай многоборье көрүҥнэригэр федерациятын 1-кы куубагын хамаанданан күрэхтэһиитигэр “Үс төгүл үс”, тутум эргиир, хапсаҕай, мас-рестлинг итиэннэ 200 миэтэрэҕэ сүүрүүгэ эстэпиэтэ көрүҥнэригэр илин-кэлин түһүстүлэр. Хамаанда састааба 3 киһиттэн турар. Бары көрүҥнэргэ хамаанданан очукуо тахсар.
Бу күрэхтэһиигэ Дыгын оонньууларын кыайыылаахтара Кэбээйиттэн Алексей Уваровскай, Амматтан Леонид Филиппов уонна да атын саха многоборьетын көрүҥнэригэр биллэр-көстөр күүстээх спортсменнар Кэбээйиттэн Артем Дьяконов, Яков Дмитриев, Амматтан Тимофей Большаков, Чурапчыттан Павел Друзьянов, Тааттаттан Николай Матаннанов, Мэҥэ Хаҥаластан Давыд Колесов кыттыылара дьон болҕомтотун тарта, күрэхтэһии таһымын үрдэттэ.
Биһиги улууспут хамаандатын улууспут саха многоборьетыгар ыстаарсай тириэньэрэ, дэгиттэр спортсмен, хотугу многоборье көрүҥэр СӨ успуордун маастара Темир Сыдыкбеков дьарыктаан, сүүмэрдээн, Майаттан Давыд Колесов, Павловскайтан Арсен Федоров, Төхтүртэн Дамир Попов киирэн кытыннылар.
Спортсменнарбытын кылгастык сырдатар буоллахха, Давыд Колесов Майаҕа төрөөбүт, үөрэммит, билигин Дьокуускайга олорор, кэргэннээх, икки оҕолоох, куорат баһаары утары сулууспатын үлэһитэ. Кини саха многоборьетынан 2014-2015 сс. утумнаахтык дьарыктанар, оскуолаҕа үөрэнэр кэмнэригэр хапсаҕайга Владимир Яковлев тириэньэрдээбитэ. “Дыгын оонньуутун” кыттыылааҕа, хапсаҕайга СӨ успуордун маастара, 2018 с. өрөспүүбүлүкэҕэ П.Алексеев бирииһин уонна Хаҥалас хапсаҕайын боруонса призера, 2020 с. Хаҥалас хапсаҕайын чөмпүйүөнэ.
Арсен Федоров оҕо эрдэҕиттэн көҥүл тустуунан утумнаахтык дьарыктаммыт, саха многоборьетынан үһүс сылын дьарыктанар, Майатааҕы лиссиэйи бүтэрэн, билигин ХИФУ 2-с кууруһун устудьуона. Кини уопсай үөрэхтээһин тэрилтэлэрин иһинэн ыытыллыбыт национальнай көрүҥнэргэ өрөспүүбүлүкэтээҕи “Өбүгэ оонньуулара” бэстибээлин 8-10-с кылаас оҕолорун икки ардыларыгар муҥутуур чөмпүйүөн, 2023 с. өрөспүүбүлүкэтээҕи “Үрүҥ Уолан” күрэхтэһиигэ, 2023 с. өрөспүүбүлүкэтээҕи “Добун” национальнай многоборьеҕа “Лөгөй” эр дьон түмсүүтүн түһүлгэтигэр, 2023 с. “Бэргэн оонньууларын” үрүҥ көмүс призера.
Дамир Попов 2006 сыллаах төрүөх, 5-с кылаастан Харатааҕы успуорт оскуолатыгар үөрэммитэ, билигин Р.М.Дмитриев аатынан Олимпийскай эрэллэри бэлэмниир училище 3-с кууруһун устудьуона. Өрөспүүбүлүкэҕэ мас тардыһыытын үс төгүллээх чөмпүйүөнэ, 2024 с. “Бэргэн оонньууларын”, 2024 с. улууспут нэһилиэктэрин баһылыктарын бирииһигэр өрөспүүбүлүкэтээҕи “Мэҥэ куубага” күрэхтэһии үрүҥ көмүс призера, 2024 с. национальнай многоборьеҕа 2006-2007 с.т. уолаттарга өрөспүүбүлүкэ чөмпүйүөнэ.
Саха саарыннарын эгил-тэгил эрийсиилээх киирсиилэрин уопсай түмүгүнэн Кэбээйи улууһа 9 очукуону ылан бастакы, Амма улууһа 15 очукуону ылан иккис миэстэҕэ таҕыстылар.
Мэҥэ Хаҥалас улууһун хамаандата “Үс төгүл үскэ” ахсыс, тутум эргииргэ үһүс, хапсаҕайга иккис, мас тардыһыытыгар бастакы, эстэпиэтэҕэ алтыс миэстэлэри ылан, уопсайа 20 очукуолаах үһүс бочуоттаах миэстэни ылары ситистэ.
Спортсменнарбытын өйөөн “Бачыым” маҕаһыын салайааччыта, урбаанньыт Никифор Дмитриев, “Строй-индустрия” ХЭТ дириэктэрэ Егор Неустроев, “Саха дизайнер” тэрилтэ салайааччыта Станислав Соловьев, Майатааҕы Үөрэтэр-оҥорон таһаарар киин успуорт инбэнтээрин ылыыга, сүүмэрдиир дьарыктары, күрэхтэһиилэри тэрийэргэ успуонсардаан көмөлөстүлэр. Спорсменнары анал пуормаларынан урбаанньыт “Yakutian Sport” таҥас брендын тарҕатааччы Алексей Григорьев хааччыйда. Успуонсардарбытыгар махталбытын биллэрэбит.
Чулуу спортсменнарбыт, улууспут многоборьеҕа федерацията 1-кы куубакка ситиһиилэннибит! Улууспутугар саха многоборьетыгар өссө да ситиһиилэр кэлэ турдуннар. Эдэр ыччаппыт бу ситиһииттэн кынаттанан утумнаахтык дьарыктанан көрдөрүүлэрин тупсаран иһэллэрин туһугар сырабытын ууран таһаарыылаахтык үлэлэһиэхпит.
Мэҥэ Хаҥалас улууһун саха многоборьетыгар федерацията.
