Сонун бырайыак
СӨ Ил Дархана Айсен Николаев ааспыт сыл муус устар 25 күнүгэр оҥорбут Анал этиитигэр оскуола оҕолорун дьарыктаах буолууларыгар олоҕуран, Мэҥэ Хаҥалас уонна Горнай улуустарыгар «Мин бастакы хамнаһым» пилотнай бырайыагы олохтуур туһунан эппитэ. Ол бырайыак, чуолаан Мэҥэ Хаҥалас улууһугар, олоххо киллэриллэн оҕо дьарыктаах буолуутугар, кинини илии үлэтигэр сыһыарыыга уонна дьиэ кэргэн үбэ хаҥыырыгар туһаайыллан Майаҕа «Кэрэли» оҕону эбии үөрэхтээһин киинин иһинэн ааспыт сайын устата лааҕыр үлэлээбитэ.
Бырайыак үлэтин көҕүлээччилэринэн, тэрийээччилэринэн “Мэҥэ Хаҥалас улууһа” муниципальнай оройуон, СӨ Үлэҕэ уонна социальнай сайдыыга министиэриэстибэтэ буолбуттара. Сонун сүүрээн олоххо киириитигэр улуустааҕы социальнай көмүскэллээх буолуу, үөрэх, социальнай бэлиитикэ, култуура уонна духуобунай сайдыы, тыа хаһаайыстыбатын управлениелара, нэһилиэнньэ дьарыктаах буолуутун киинэ, улуустааҕы биисинэс-инкубатор быһаччы күүс-көмө, өйөбүл буолбуттарын бэлиэтиибит.
Икки ый устата үлэлээбит лааҕырга 14‒18-гар диэри саастаах 20 оҕо хабыллан хамнастанан дьиэ кэргэн дохуотун үрдэттилэр, ону сэргэ дьоҕурдарын, талааннарын арыйдылар, сайыннардылар. Оҕолор эбии үөрэхтээһин киинин иһинэн үлэлиир «Уран эйгэ» айар түмсүүгэ туойтан араас оҥоһуктары айан, чочуйан таһаардылар. Оҕолорго ыһыахтар, өрөспүүбүлүкэтээҕи педагогтар дьаарбаҥкаларын тэрээһиннэринэн элбэх сакаас киирэн үлэ таһаарыылаах уонна үтүө түмүктээх буолла. Бырайыак эбии үөрэхтээһин киинин материальнай-тэхиньиичэскэй баазатын бөҕөргөтүүгэ эмиэ улахан көмөлөөх буоллла. Лааҕыр Майаҕа үлэлээбит буолан В.П.Ларионов, Ф.Г.Охлопков ааттарынан оскуолалар, И.Г.Тимофеев аатынан лиссиэй үөрэнээччилэрэ хабылыннылар. Оҕолорго үлэ киниискэтэ арылынна. Нэдиэлэҕэ оҕолор үс күн 4 чаас үлэлээн ыйга 12 үлэ күнүгэр материальнай көмөнү киллэрэн туран, 20 тыһ. солк. кэриҥэ хамнас ааҕыстылар.
“Мин бастакы хамнаһым” бырайыак кыттыылааҕа, И.Г.Тимофеев аатынан Майатааҕы лиссиэй 8-2 кылааһын үөрэнээччитэ Алена Федорова лааҕырга дьарыгын туһунан бу курдук кэпсээтэ:
‒ Ааспыт сайын от ыйыгар “Кэрэли” эбии үөрэхтээһин “Уран эйгэ” устуудьуйа иһинэн «Мин бастакы хамнаһым» диэн бырайыак чэрчитинэн Майаҕа үлэлээбит лааҕыр иккис сезонугар хабыллан үлэлээбитим.
Бөлөхпүтүгэр холбоон 10 оҕо буолан үлэлээбиппит. Үлэбит чааһа сарсыарда 10-тан 14 чааска диэри этэ. Салайааччыбыт Евдокия Ивановна Захарова оҥоһуктары оҥорууга барыбытыгар быһааран, көрдөрөн, үөрэтэн биэрбитэ, ыарырҕаттахпытына сүбэлээн, көннөрөн биэрэн көмөлөһөр этэ. Сезон устата туойтан сувенир бородууксуйаларын ‒ хомпуурдары, чуорааннары, харысхаллары оҥорбуппут. Оҥоһуктарбытын атыыга, бэлэххэ баралларыгар табыгастаах, сиэдэрэй көстүүлээх буолар гына кумааҕыттан олорго анал хопполору оҥорорго үөрэммиппит.
Лааҕырга сылдьан иллэҥ кэммин туһалаахтык атааран, элбэххэ үөрэнэммин олус астыммытым. Саҥа оҕолору кытта билсибитим. Манна үлэлээн аахсыбыт бастакы хамнаспын туттубакка ууруммутум. Күһүҥҥү сынньалаҥ кэмигэр Нерюнгри куоракка остуол тиэнниһигэр күрэхтэһэ барарбар уһун айаҥҥа анаан суотабай төлөпүөммэр пауэрбанк ылыммытым уонна ас-танас ылынарбар туттубутум. Быйыл сайын бу лааҕыр арыллар буоллаҕына, үөрэ-көтө өссө үлэлии кэлэргэ бэлэммин.
Алена ДОКТОРОВА.
