Бары да тыын суолталаах хайысхалар хабылыннылар

Анал этии

 

Таисия Десяткина, СӨ Бочуоттаах гражданина, РФ уонна СӨ тыатын хаһаайыстыбатын үтүөлээх үлэһитэ, Мэҥэ Хаҥалас улууһун Бочуоттаах гражданина, «Тумул» производственнай кэпэрэтиип дириэктэрэ.

Владимир Путин РФ Федеральнай Мунньаҕар Арассыыйа судаарыстыба быһыытынан 2030 сылга диэри сайдыытыгар киэҥ, дириҥ ис хоһоонноох этиини туһаайда. Дойдубут суверенитетын көмүскээһиҥҥэ, бөҕөргөтүүгэ үлэ бары салааларынан күүскэ барарын уонна, биллэн турар, анал байыаннай дьайыыга кыттар байыастарбыт Аҕа дойдуларын бэриниилээхтик көмүскүүллэрин сиэрдээхтик киэн тутта бэлиэтээтэ.

Арассыыйа доҕордуу судаарыстыбалары кытары инникитин да бииргэ үлэлэһэргэ, ааспыт сылга дойду экэниэмикэтэ үчүгэй көрдөрүүлэри ситиһэн аан дойду үрдүнэн түөрт бөдөҥ экэнэмиэкэтин иһигэр киирэр кыахтаммыт тиэмпэтин салгыы сайыннарарга, 2030 сылга диэри сүрүн салааларга инбэстииссийэ кээмэйин 70 бырыһыаҥҥа диэри эбэргэ о.д.а эттэ.

«Дьиэ кэргэн», «Арассыыйа ыччаттара», «Экэниэмикэ дааннайдара», «Уһун уонна көхтөөх олох», «Каадырдар» диэн саҥа национальнай бырайыактар киллэриллэллэр буоллулар. Бары да тыын суолталаах хайысхалар хабылыннылар дии саныыбын.

Тыа хаһаайыстыбатын салаатын үлэһитэ буоларбынан, Анал этиигэ Владимир Путин тыа хаһаайыстыбатын үлэһиттэригэр кэлин сылларга ситиһиллибит түмүктэр иһин махтаммытын долгуйа иһиттим. Кини  2030 сылга диэри агропромышленнай комплекс оҥорон таһаарыыта 2021 сыллааҕы көрдөрүүттэн чиэппэртэн итэҕэһэ суох, оттон экспорт 1,5 төгүл үрдүүрэ ситиһиллиэхтээҕэр соругу туруорда. Бэрэсидьиэн агропромышленнай косплекска аччыгый уонна орто биисинэс үлэтин чорботон бэлиэтээтэ.  Арассыыйа аһынан-үөлүнэн бэйэтин толору хааччынарын таһынан бурдук ырыынагар лиидэр буоларын, аһылыгы экспорка таһаарыыга инники күөҥҥэ сылдьар сүүрбэ судаарыстыба иһигэр киирсэрин Бэрэсидьиэн ыйда. Кини агрпромышленнай комплекс салаатын итиэннэ тыа сирин территорияларын салгыы өйүөхпүт диэн этиитэ астыннарда.

Анал этиигэ олох бары салааларыгар ыйыллыбыт  соруктар олоххо киллэриллэллэригэр эрэнэбит. Онуоха  дойдубут хас биирдии олохтооҕо бэйэтин туһааннаах үлэтинэн-хамнаһынан күүс-көмө, өйөбүл буолуохтаах. Бары бииргэ сомоҕолоһон сайдыы суолун тутустахпытына инникитин олохпут өссө тупсуоҕа.