Олунньу 21 күнүгэр В.К.Степанов аатынан 68-с култуура уонна успуорт эстэпиэтэтин былааҕа улууспут киинигэр Аллараа Бэстээххэ күөрэйдэ. Манна Мэҥэ нэһилиэгин култуураны, успуорду өрө туппут дьоно ыалдьыттаатылар.
Күнүс 12 чаастан Аллараа Бэстээх бөһүөлэгэр эстэпиэтэ оһуокайа төрүттэннэ. Барыта 87 киһи биир санаанан салайтаран, икки түһүлгэлээх оһуокайы төрүттээн ыыттылар. Эдэр кэскиллээх үҥкүү тылын таһаарааччылар Егор Никитин Мэҥэлии оһуокай, Нарыйа Сидорова Бүлүүлүү оһуокай, ону тэҥэ Аксиния Степанова Мэҥэлии оһуокай уратыларын, уус-уран тылларын-өстөрүн, кылыһахтаах чуор куоластарын бар дьоҥҥо иһитиннэрдилэр. Көрүү түмүгүнэн Аллараа Бэстээх оһуокайа 4,10 баалга сыаналанна.
Аллараа Бэстээх бөҥүөлэгин уус-уран оҥоһугун быыстапкатыгар СӨ норуотун маастардара, улууспут уран тарбахтаахтара, уустара үлэлэспиттэрэ биһирэннэ. Төрүт иис үлэтигэр Кузьмина Александра Петровна, Луковцева Светлана Егоровна, Попова Александра Семеновна, кылтан, сиэлтэн үлэлэргэ Скрябина Мария Николаевна, ювелирнай оҥоһукка Захаров Иннокентий Кононович, мастан, туостан оҥоһуктарга Лавернов Сергей Виссарионович, Апросимов Лука Евгеньевич, Оконешникова Анисия Семеновна, Дмитриева Розалия Семеновна үлэлэрэ, Зедгенидзева Ольга Евгеньевна хартыыналара, Аллараа Бэстээх 2-с нүөмэрдээх оскуолатын паннота, «Баһылай Манчаары» куукула композицията, тимир оҥоһуктарга Сидоров Валентин Валентинович, Костромин Николай Николаевич үлэлэрэ кэрэхсэннилэр. Быыстапка 3,92 баалга сыаналанна.
Успуорт көрүҥнэригэр икки хамаанда эрбии тииһин курдук тэҥҥэ кииристилэр. Мас тардыһыытыгар, хапсаҕайга, ханаат тардыһыытыгар ыалдьыттар күүскэ бэлэмнэнэн кэлбиттэрин көрдөрдүлэр. Волейболга олохтоохтор иннилэрин биэрбэтилэр. Тыҥааһыннаах киирсии түмүгэр, ахсаан 18 – 17 тэҥнэһэн, олохтоохтор кыайыыны суруннулар.
Киэһэ 19 чаастан Мэҥэ нэһилиэгин уус-уран кэнсиэрэ саҕаланна. Ирдэбилгэ киирбит 18 нүөмэри олохтоохтор сэргии көрдүлэр. Хуор толоруутугар “Мэҥэ өрөгөйүн ырыата”, “Ситим” эр дьон ансаамбылын толоруутугар “Манчаары Баһылай”, “Мичээр” үҥкүү бөлөҕүн “Дьиэрэҥкэй” үҥкүүтэ, оригинальнай жанр нүөмэрэ, “Сайдыына” кыргыттар ансаамбыллара, “ Уран” уолаттар үҥкүүлэрэ, Рима Фадеева толоруутугар Анна Барашкова “Сахам сирэ” ырыата, ыччат түмүктүүр блога дипломант буоллулар.
Бастыҥ нүөмэрдэринэн хуор толоруутугар “Тыыннаахтар умнубат сыллара” ырыа, эр дьон квартетын толоруутугар “Герой Попов туһунан ырыа” уонна Елена Владимирова толоруутугар “Журавли” ырыа ааттанан, лауреат буоллулар. Кэнсиэргэ барыта 75 киһи кытынна. Балыктаахтар кэнсиэрдэрэ 4,0 баалынан сыаналанна.
Култуура уонна успуорт эстэпиэтэтин алгыстаах айана салҕанар. Нэһилиэктэрбитигэр ситиһиини баҕарабыт. Ким түмсүүлээх, үчүгэй бэлэмнээх – ол кыайдын!
