Чэбдик салгыннаах, хаар үллүктээх кырыа кыһын салаллыбыт кэмигэр Балыктаах бөһүөлэгэр олохтоох култуура дьиэтигэр «Ыллыкчаан» көрдөрүүлээх үҥкүү уонна «Сэргэхчэй» фольклор ансаамбылларын иитиллээччилэрэ үҥкүү, ырыа дьоро киэһэтин тэрийэн ыыттылар.
Аяна Васильева «Родина моя» хоһоонунан кэнсиэри саҕалаата. Кулууп саалатын толору мустубут көрөөччүлэр, төрөппүттэр сүргэлэрэ көтөҕүллэн олорон «Ыллыкчааннар» толорууларыгар «Я, ты, он, она», «Оһуокай», «Мастерицы», «Орончикан», ансаамбыл салайааччыта Мария Кычкина уонна Айыллаана Сотникова толорууларыгар «Чэмэлиинэ», Сандаара Стручкова, Андрей Васильев толорууларыгар эбэҥкилии, Айыллаана, Дайаана Сотниковалар монголлуу, Нарияна Колесова уонна Юра Ноговицын нуучча норуодунай үҥкүүлэрин сэргии көрдүлэр. «Сэргэхчэй» фольклор ансаамбыла (сал. Күннэйэ Цыпандина) толоруутугар «Оҕо саас чуораана» ырыаны, Күннэйэ Цыпандина, Таня уонна Ярик Сотниковтар хомуска дьүһүйүүлэрин, ансаамбыл толоруутугар чыыбы-чаабы чабырҕаҕы, төрдүс кылаас үөрэнээччилэрин толоруутугар Сергей Васильев суруйуутугар «Батастаах баатыр» олоҥхону, үһүс кылаас кэлэктиибин толоруутугар «Уолаттар, кыргыттар» ырыаны бэрт чобуотук толордулар. «Ыллыкчаан» үҥкүүһүттэрэ өссө «Дьөһөгөй», «Здравствуй, снег», «Дьиэрэҥкэй», «Таас үрэх» үҥкүүлэрин бэлэхтээтилэр. Кэнсиэр «Кэрэли» эбии үөрэхтээһин Өрөгөй ырыатынан өрө көтөҕүллүүлээхтик түмүктэннэ. Кэнсиэри Сайнаара Стручкова, Сайдам Винокуров бэрт сэргэхтик иилээн-саҕалаан ыыттылар.
Кэнсиэр аахсыйа көрүҥүнэн ыытылынна. Эрдэттэн бэлэмнэнэн, каникул кэмигэр оскуолаҕа хаартыскаҕа түһэриини тэрийэн билиҥҥи түгэни үйэтитэр сонун бырайыак үлэлээтэ. Сонун сүүрээни биһирээн-өйөөн элбэх төрөппүт дьиэ кэргэнинэн, оҕолор, биирдиилээн да дьон кыттыбыттарыгар бырайыак тэрийээччилэрэ истиҥ махталларын биллэрдилэр. Бырайыактан уонна кэнсиэргэ ыытыллыбыт аахсыйаҕа киирии билиэттэн киирбит үп-харчы ансаамбылларга дьарыктанар оҕолорго саҥа көстүүм тиктэллэригэр ананна. Үҥкүү, ырыа, фольклор кэрэ эйгэтигэр уһуйуллар оҕолорго, кинилэр салайааччыларыгар инникитин элбэх ситиһиилэри баҕарабыт.
Мария Захарова. Балыктаах
