Улууспутугар Олоҥхо ыйын чэрчитинэн Балыктаахха «Олоҥхоһут ‒ оскуолаҕа» бырайыагынан уонна олохтоох култуура дьиэтигэр нэһилиэнньэни кытта улууспутугар «Уруйдан Улуу Олоҥхо, Манчаары дойдутугар» девизтээх «Кэс тыл уйата ‒ Улуу Олоҥхо» Саха НКИХ үһүс төгүлүн тэрийбит «Олоҥхо баттл» кыайыылааҕа, СӨ култууратын туйгуна, тойуксут, Саха сирин үтүөлээх оһуокайдьыта Аксиния Степановалыын уонна алгысчыт, сиэри-туому тарҕатааччы, тойуксут, олоҥхону толорооччу, Саха сирин үтүөлээх оһуокайдьыта, Саха Өрөспүүбүлүкэтин, Мэҥэ Хаҥалас улууһун Дархан оһуокайдьыта Денис Оконешниковтыын бэрт сэргэх көрсүһүү буолан ааста.
Дьоро күн долгутуулаах түгэнинэн Аксиния Степанова уһуйааччытыгар, үтүө сүбэһитигэр Афанасий Никифорович Протодьяконовка «Саха Өрөспүүбүлүкэтин уус-уран самодеятельноһын бэтэрээнэ» түөскэ анньыллар анал бэлиэни истиҥ махталын тиэрдэн туран туттарбыта буолла.
Олоҥхоһут киһи хас биирдии дьоруойун саҥатын-тойугун тус туһунан оруолга киирэн толорорун ыалдьыттарбыт мустубут дьоҥҥо итэҕэттилэр. Биир дойдулаахпыт, нэһилиэкпит талааннаах ыччата Аксиния Степанова олоҥхо кэрэ түһүлгэтин тэнитэн бэйэтин айылҕаттан бэриллибит талаанынан тойугунан туойан, хоһоонунан хоһуйан, хомуһунан доҕуһуоллаан олоҥхо үтүө түһүлгэтин тэниттэ. Салгыы өрөөбүт уоһун өһүлэн сиэр-туом тула сэргэх сэһэнин үөрэ-көтө көрөөччүлэргэ Денис Оконешников тиэртэ.
Аксиния Николаевнаҕа эҕэрдэ тылларын, алгыстарын уһуйааччыта Афанасий Протодьяконов, «Мэҥэ нэһилиэгэ» тыа сирин түөлбэтин дьаһалтатын аатыттан култуура дьиэтин дириэктэрэ Любовь Кычкина, «Лесной» түөлбэ олохтоохторуттан Мария Кычкина, аймах-билэ дьонуттан Сардаана Стручкова, бииргэ үөрэммит доҕотторун ааттарыттан учуутала Жанна Андросова тиэртилэр. Бэйэлэрин эҕэрдэлэрин Сергей Зверев суруйуутугар «Батастаан Баатыр» олоҥхонон төрдүс кылаас үөрэнээччилэрэ (сал. Күннэйэ Цыпандина) анаатылар. Мэлдьи сүбэ-ама, өйөбүл буолар үтүө санаалаах ыччаппытыгар Денис Оконешниковка өйдөбүнньүк бэлэҕи туттардылар.
Салгыы илии-илииттэн ылсыһан, төгүрүччү туран үөрэ-көтө саҕалаан саха омук таптыыр оһуокайыгар ыалдьыттарбыт Аксиния Степанова, Денис Оконешников оһуокайы таһаардылар. «Кэхтибэт кэс тыл уйата ‒ Улуу Олоҥхо » тэрээһини иилээн-саҕалаан сэргэхтик Петр Дохунаев ыытта. Сылдьыбыт дьон бүгүҥҥү тэрээһини киэргэппит, сэргэхсиппит кэскиллээх ыччаттарбытыгар махтал истиҥ тылларын эттилэр.
Мария Захарова. Балыктаах
